अब मदिरा सेवन गर्न लाईसेन्स अनिवार्य
जुम्ला- के तपाईलाई थाहा छ? मदिरा सेवन गर्न लाईसेन्स चाहिन्छ भनेर । यदि छैन भने अब थाहा पाउनुहोस् । गुठिचौर गाउँपालिकामा मदिरा सेवन गर्नेलाई लाईसेन्स अनिवार्य गरेको छ ।
गाउँपालिकाले आगामी भाद्र १ गतेदेखि लागू हुने गरी लाईसेन्स अनिवार्य गरेको हो । गाउँपालिकाका प्रवक्ता अर्जुन कुमार महताराका अनुसार गाउँपालिकालाई मदिरा निषेधित पालिकाु घोषणा गर्नको लागि लाइसेन्स अनिवार्य गरेको हो ।
उनले सोलाई कार्यान्वयनमा ल्याउनका लागि मदिरा नियन्त्रण तथा व्यवस्थापन कार्यविधि जारी गरेको बताउनुभयो । सो कार्यविधिलाई आधारमा मानेर लाईसेन्स अनिवार्य गरेको उहाँले बताउनुभयो ।
उहाँले सो कार्यविधि अनुसार पालिकाभित्र मदिरा उत्पादन गर्ने, वितरण गर्ने, सेवन गर्ने तथा ओसार पसार गर्ने सबै व्यक्तिले अनिवार्य रुपमा लाईसेन्स लिनु पर्ने छ । लाइसेन्स नलिई सो कार्य गरेको पाइएमा कानुन बमोजिम कारबाही गरिने उहाँले बताउनुभयो ।
मदिरा सेवनले पालिका क्षेत्रमा धेरै विकृती फैलिएको छ । शान्ति सुरक्षामा समेत असर परेको छ, उहाँले भन्नुभयो, सो नियन्त्रणका लागि पालिकाले सो निर्णय गरेको हो ।
उनले लाईसेन्स बनाउनका लागि नेपाल सरकारको प्रचलित कानुन बमोजिमको प्रक्रिया लागू हुने बताउनुभयो । गाउँपालिकामा ५०० रुपैयाँ दस्तुर तिरी आवेदन दिएर लाइसेन्स दिन सकिने छ, उहाँले भन्नुभयो, थोरै मदिरा सेवन गर्ने तथा घरमै सेवन गर्नेलाई सो लागू हुँदैन ।
उनका अनुसार एक व्यक्तिले एक दिनमा बियर अधिकतम एक बोतल र हार्डड्रिंक्स १ सय ८० मिलिलिटर मात्र सेवन गरेमा सो लागू हुँदैन । सोभन्दा बढी पिउनु परेमा मात्रै लाईसेन्स अनिवार्य रहेको उहाँले बताउनुभयो ।
उहाँले पालिकाभन्दा बाहिरका लागि एक सय रुपैयाँमा अतिथि मदिरा कार्ड उपलब्ध गराइने बताउनुभयो । 
प्रतिक्रिया