खुला वडा स्तरीय महिला, पुरुष भलिबल प्रतियोगिता हुने

रुकुम पश्चिम–  रुकुम पश्चिमको सदरमुकाम मुसिकोट खलंगामा खुला वडा स्तरीय महिला पुरुष भलिबल प्रतियोगिता हुने भएको छ । रुकुम पश्चिम भलिबल प्रशिक्षण केन्द्रले  खलंगाको बराहटाकुरामा असोज २० गते देखि २५ गतेसम्म खुला वडा स्तरीय “जनक–सुधन स्मृति रनिङ्ग शिल्ड महिला तथा पुरुष भलिबल २०८०” सञ्चालन गर्ने भएको हो । पूर्व खेलाडीद्धय जनक शाह र सुधन श्रेष्ठको सम्झनामा प्रतियोगिता आयोजना गरिएको रुकुम पश्चिम भलिबल प्रशिक्षण केन्द्रका अध्यक्ष तेजविक्रम विएमले बताउनुभयो । शाह र श्रेष्ठको गाडी दुर्घटनामा मृत्यु भएको थियो ।

प्रतियोगिता अन्तर्गत पुरुष तर्फको विजेताले नगद १ लाख ५१ हजार, रनिङ्ग शिल्ड, कप, मेडल र प्रमाण–पत्र प्राप्त गर्ने अध्यक्ष बिएमले बताउनुभयो । उहाँका अनुसार उपविजेताले नगद १ लाख १ हजार, कप, मेडल र प्रमाण–पत्र पाउँदा तृतीय स्थान हासिल गर्ने टिमले नगद ५१ हजार कप, मेडल र प्रमाण–पत्र पाउने छन् । विभिन्न विधागत तर्फ पनि पुरस्कारको व्यवस्था गरिएको छ । वेस्ट प्लेयरले १५ हजार बराबरको स्मार्ट फोन पाउँदा, उदयमान खेलाडी, वेस्ट सेटर, वेस्ट ब्लकर, वेस्ट डिफेन्डर, वेस्ट स्पाइकर र वेस्ट सर्भरले समान २ हजार ५ सयका साथमा कप, मेडल र पमाण–पत्र पाउँने आयोजकले जनाएको छ । 

त्यस्तै महिला तर्फको विजेताले नगद ५१ हजार, रनिङ्ग शिल्ड, कप, मेडल र प्रमाण–पत्र पाउँने छ । उपविजेताले नगद ३१ हजार तथा तेस्रो हुने टिमले नगद २१ हजार कप, मेडल र प्रमाणपत्र पाउने बताइएको छ । महिलाको विधागत तर्फ वेस्ट प्लेयरले नगद ५ हजार तथा उदयमान खेलाडीले नगद २ हजार कप, मेडल र पमाण–पत्र पाउने अध्यक्ष बुढाले बताउनुभयो । खेल शुद्ध वडास्तरीय हुने छ उहाँले बताउनुभयो ।

भलिबल प्रशिक्षण केन्द्रले विभिन्न प्रतियोगिताहरु आयोजना गर्दै आइरहेको छ । केही महिना अघि मात्र केन्द्रले कर्णाली प्रदेशकै सर्वाधिक पुरस्कार राशिको भलिबल प्रतियोगिता सञ्चालन गरेको थियो ।