खुम्बु पासाङल्हामुले विपन्नको उपचारमा गर्यो ४८ लाख खर्च
सोलुखुम्बु – खुम्बु पासाङल्हामु गाउँपालिकाले वडा नम्बर ५ ठमोकी ७२ वर्षीया कान्छी फुटी शेर्पाको उद्धार गरी हेलीकोप्टरमार्फत काठमाडौं पठाएको छ । घरमै लडेर घाइते भएकी उनलाई उपचारको लागि नजिकैको खुन्दे अस्पतालमा लगिएको थियो । तर उनलाई अस्पतालले रिफर गरेपछि गाउँपालिकाले शुक्रबार बिहानै उद्धार गरी काठमाडौं पठाएको हो ।
गाउँपालिकाले ‘विपन्न नागरिक औषधि उपचार कार्यक्रम’ मार्फत उनको उद्धार गरेको जनाएको छ । खुम्बु पासाङल्हामु गाउँपालिका भौगोलिक रुपमा विकट रहेको हुँदा हालसम्म सडक सञ्जाल पुगेको छैन ।
गाउँपालिकामा रहेको एकमात्र तेन्जिङ हिलारी विमानस्थलसम्म आउनै ठमोबाट २ दिन लाग्छ । त्यसैले गाउँपालिकाले कान्छीकफ हेलीकोप्टरमार्फत उद्धार गरेको हो । कान्छीजस्ता समस्या भएकालाई गाउँपालिकाले नियमित उद्धार गर्दै आएको छ ।
गाउँपालिकाले ‘विपन्न नागरिक औषधि उपचार कार्यक्रम’मार्फत हेलीकोप्टर चार्टर शुल्कसँगै १० लाखसम्म उपचार खर्च सहयोग गर्दै आइरहेको गाउँपालिकाको स्वास्थ्य शाखा प्रमुख उद्धव ढुङ्गानाले बताउनुभयो । उहाँका अनुसार गत आर्थिक वर्ष ०८९/०८० मा गाउँपालिकाभर ३८ जनाको उद्धार तथा उपचारमा सहयोग गरेको छ ।
ती दुवै सेवा पाउनका लागि पालिकाभित्र रहेका अस्पतालले रेफर गरेको कागजात, वडाले गरेको विपन्न सिफारिस र काठमाडौंमा गरिएको उपचारको प्रमाणित कागजात हुनुपर्ने गाउँपालिकाले जनाएको छ । गत आर्थिक वर्षामा ३८ विपन्नको उद्धार र उपचारमा करिब ४८ लाख रुपैयाँ खर्च भएको गाउँपालिकाको तथ्यांकमा उल्लेख छ ।
गाउँपालिका विपन्नहरूको सारथी भएर उद्धार तथा उपचारमा सहयोग गरेपछि धेरैको ज्यान जोगिएका छन् । यो कार्यक्रमबाट स्थानीय पनि खुशी भएका छन् ।
प्रतिक्रिया