पहिरो पीडितलाई दशैं खाद्यन्न

दैलेख – हिन्दू धर्मालम्बीहरुको मुख्य चाड दशैंको अवसरमा सोसेक नेपालले नौमूले गाउँपालिका र आठबीस नगरपालिकाका पहिरो पीडित १४ परिवारलाई दशैं खाद्यन्न र कपडा सहयोग दिएको छ । पालिकाहरुको आग्रहमा उक्त सहयोग गरिएको सोसेक नेपालका कार्यकारी निर्देशक हीरासिंह थापाले जानकारी दिनुभयो । 

प्रतिनिधिसभा साँसद सीताकुमारी राना र नौमूले गाउँपालिका अध्यक्ष छबिराम सुबेदी लगायतका जनप्रतिनिधिहरुको रोहबरमा शुक्रबार नौमूलेमा र साँसद रानासंगै आठबीस नगरपालिकाका जनप्रतिनिधिहरुको उपस्थितिमा शनिवार राकममा दशैं खाद्यन्न र कपडा सहयोग दिएको हो । 

डीसीएको साझेदारीमा सञ्चालित ग्रीन कर्णाली परियोजना अन्तरगत दिइएको उक्त सहयोगमा प्रति परिवार ५० केजी चामल, एक पेटी तेल, तीन केजी नून, डेढ दर्जन साबुन, हरेक परिवारलाई दुई–दुई वटा कम्बल, तन्ना र सिरानी समेतका सामग्री दिइएको हो । 

पहिरो प्रभावित परिवारलाई दशैंका बेला पाएको यो सहयोगले पहिरो पीडित परिवारहरुलाई ठूलो सहयोग पुगेको भन्दै सहयोगी संस्थाहरुलाई आठबीस नगरपालिकाका पुर्व मेयर खड्गराज उपाध्ययले धन्यवाद दिनुभयो । सहायता पाएपछि दशैं र तिहारलाई खाद्यन्न अभावको चिन्ता हटेको नौमूले गाउँपालिका–४ कालिकाकी मन्धरा सिजालीले खुशी व्यक्त गर्नुभयो ।