कांग्रेसले कर्णालीमा ‘जागरण अभियान’ सञ्चालन गर्दै

सुर्खेत –   नेपाली कांग्रेसले कर्णालीमा जागरण अभियान सञ्चालन गर्ने भएको छ । बिहीबार सल्यानको सदरमुकाममा बसेको प्रदेश कमिटीको बैठकले अभियान सञ्चालन गर्ने निर्णय गरेको हो ।

कांग्रेसका प्रदेश कमिटी सभापति ललितजंग शाहीको सभापतित्वमा ११ औँ नियमित एवं तेस्रो घुम्ती बैठक सल्यान खलङ्गामा बसेको थियो । उक्त बैठकले कर्णालीका कांग्रेसलाई सुदृढ र बलियो बनाउनका लागि जागरण अभियान सञ्चालन गर्ने निर्णय गरिएको प्रवक्ता दमन शाहीले बताउनुभयो ।

‘कर्णाली प्रदेशका सबै जिल्लामा कांग्रेसलाई बलियो बनाउन ‘सुदृढ कांग्रेस, समृद्ध कर्णाली भन्ने’ मूल नाराका साथ उक्त अभियान चलाइने छ,’ शाहीले भन्नुभयो, ‘यो अभियानले पार्टीलाई रूपान्तरण गर्ने विश्वास हाम्रो छ ।’

पार्टी सङ्गठन चलायमान बनाउन नेता, कार्यकर्ता भेटघाट, मातहतका कार्य समितिका बैठक बस्ने, अग्रज नेताहरूसँग भेट्ने, निर्वाचित जनप्रतिनिधिहरूलाई नागरिकको पक्षमा काम गर्न प्रेरित गर्ने काम अभियानका क्रममा हुनेछन् । 

साथै भ्रष्टाचार मुक्त समाज निर्माण गर्न नेता, कार्यकर्तालाई परिचालन गरिने पनि शाहीले बताए । यस्तै कांग्रेसले गरेका जनमुखी कामहरू पनि जनतालाई बुझाउने काम अभियानको क्रममा हुने छ ।

त्यसका लागि पार्टीका सबै भातृ र शुभेच्छुक संस्थालाई प्रदेशभर परिचालित हुन् निर्देशन समेत दिइएको शाहीको भनाइ छ । यद्यपि अभियानको मिति भने तोकिएको छैन । प्रवक्ता शाहीका अनुसार यसपछि बस्ने पदाधिकारीको बैठकले अभियानको मिति तय गर्नेछ ।