अछाम र दाङमा टेम्पो दुर्घटना : तीन जनाको मृत्यू

अछाम – टेम्पो दुर्घटना हुँदा अछाम र दाङमा तीन जनाको मृत्यू भएको छ । अछामको कमलबजारबाट दैलेखका लागि छुटेको सुदूरपश्चिम प्रदेश ०१००१ ह ५५४५ नम्बरको टेम्पो गए राति मध्यपहाडी राजमार्गअन्तर्गत टोट्केसालमा दुर्घटना भएको हो । 

दुर्घटनामा टेम्पो चालक कमलबजार नगरपालिका–४ का दीपक बोहरा र वडा नम्बर २ का जनक खड्काको मृत्यू भएको प्रहरी नायब उपरीक्षक सन्तोष पाठकले जानकारी दिनुभयो । 

त्यस्तै दाङको बंगलाचुलीमा अटो दुर्घटना हुँदा एक जना महिलाको मृत्यू भएको छ । दुर्घटनामा बंगलाचुली गाउँपालिका – ५ की ६५ वर्षीया भेगी बुढाको मृत्यू भएको हो ।

दुर्घटनामा घाइते बुढाको उपचारका क्रममा बाँकेको कोहलपुर मेडिकल कलेजमा मृत्यू भएको जिल्ला प्रहरी कार्यालय दाङले जानकारी दिएको छ ।

बुधवार दिउँसो  बंगलाचुली– ५ को गुरासेनी डाँडाबाट रा १ ह ५८०५ नम्बरको अटो ब्रेक फेल भइ झन्डै पाँच सय मिटर तल खसेको थियो ।