फरार अभियुक्त पक्राउ

सल्यान –  प्रहरीले विभिन्न अभियोगमा फरार चार अभियुक्तलाई पक्राउ गरको छ । विभिन्न मुद्यामा अदालतबाट दोषी ठहर भइ फरार रहेका चार अभियुक्तलाई  शनिबार पक्राउ गरिएको जिल्ला प्रहरी कार्यालय सल्यानले जनाएको छ । 

प्रहरीले शारदा नगरपालिका १३, स्यानीखाल घर भएका ४७ वर्षीय होमराज भण्डारीलाई पक्राउ गरेको छ । उनी बैंकिङ कसुरमा अदालतबाट दोषी ठहर भएपनि फरार रहेका थिए । जिल्ला अदालतले २०७७ माघ २२ गते भण्डारीलाई दोषी ठहर गर्दै ८ दिन कैद, ४ लाख ८ हजार जरिवाना तोकेको थियो ।

त्यस्तै, कपुरकोट गाउँपालिका ६ का २८ वर्षीय फौदबहादुर महतरा, ३३ वर्षीय तेजबहादुर बोहरा र ३४ वर्षीय डिल्लीबहादुर बस्नेतलाई  प्रहरीले पक्राउ गरेको जिल्ला प्रहरी कार्यालय सल्यानका सूचना अधिकारी भवानी प्रसाद धमलाले बताउनुभयो । उनीहरु कुटपिट अपराधमा अदालतबाट दोषी ठहर भई फरार रहेका थिए ।

उनीहरुलाई जिल्ला अदालतले २०७९ असोज २२ गते दोषी ठहर गर्दै ५/५ हजार जरिवाना सहितको फैसला गरेको थियो । धमलाका अनुसार होमराज भण्डारीलाई दाङबाट र अन्य तीन जनालाई उनीहरुको घरबाटै पक्राउ गरिएको हो । प्रहरीले पक्राउ परेका सबैलाई जिल्ला अदालतमा बुझाएको छ ।