तनहुँमा मिनी ट्रक दुर्घटना हुँदा दुई जनाको मृत्यु

तनहुँ -  तनहुँको देवघाट गाउँपालिका–२ कोटबैदी भोक्टेनीस्थित भित्री सडकखण्डमा गएराति मिनी ट्रक दुर्घटना हुँदा दुई जना मृत्यु भएको छ।  दमौलीबाट छिपछिपेतर्फ जाँदै गरेको ग१ख ४१८१ नम्बरको मिनी ट्रक सडकबाट अन्दाजी पाँच सय मिटर तल खस्दा दुर्घटना भएको हो। 

दुर्घटनामा ट्रकमा सवार दुई जनाको मृत्यु भएको जिल्ला प्रहरी कार्यालय तनहुँले जनाएको छ।  मृत्यु हुनेमा देवघाट –३ दगाराका ६५ वर्षीय नरबहादुर गुरुङ र ४५ वर्षीया बिमाया गुरुङ रहेको प्रहरी नायब उपरीक्षक मोहनबहादुर खाँणले बताउनुभयो । ट्रक चालकको खोजी भइरहेको उहाँले बताउनुभयो ।

ट्रक दुर्घटनामा घाइते भएका दुवैलाई उपचारका लागि दमौली अस्पताल लगिएको थियो। उपचारको क्रममा आज बिहान उनीहरुलाई चिकित्सकले मृत घोषणा गरेका हुन् ।