विश्व सम्पदा बौद्ध चैत्यको पदमार्ग पुनःनिर्माण सुरु
![विश्व सम्पदा बौद्ध चैत्यको पदमार्ग पुनःनिर्माण सुरु](https://snowberry.prixacdn.net/media/gallery_folder/baudda_6dW2u4QOx5_kzj8priiahzqk30wnq4gkvmevebtcuhmb0mamlancpnouvlgor02kn2ue5oh_Eyexp1G4Ax_yle8h15cfuve8stnhrx6wx5umv0dczsgjvdhgpkmv2orqtksd7usxsjhxmx0.jpg)
काठमाडौँ - विश्व सम्पदासूचीमा सूचीकृत बौद्ध चैत्य परिसरको पदमार्ग जीर्ण भएपछि त्यसलाई भत्काएर पुनःनिर्माण सुरु गरिएको छ । उक्त सम्पदा क्षेत्रको सौन्दर्य र सुविधामा कमी हुन नदिन बौद्धनाथ क्षेत्र विकास समितिले चालू आर्थिक वर्षमा सम्पन्न गर्नेगरी रु एक करोड ३२ लाख लागतमा पुनःनिर्माण थालेको हो ।
बौद्धनाथ क्षेत्रको सामाजिक, आर्थिक, धार्मिक र सांस्कृतिक विकास गर्न गठन भएको उक्त समितिले त्यस क्षेत्रमा पुनःनिर्माणका लागि पुरातत्व विभागले प्राविधिक अध्ययन गरेपछि स्वीकृति प्रदान गरेको समितिका कार्यकारी निर्देशक शान्तिमाया तामाङले बताउनुभयो । निर्माणका क्रममा समितिले काठमाडौँ महानगरपालिकासँग पनि समन्वय गरेको छ ।
आधुनिक संरचना विकास गर्न नपाइने भएकाले आधुनिक सामग्री प्रयोग गरी प्रचीन स्वरुपको शैलीमा इँटा बिछ्याइनेछ । उहाँका अनुसार काठमाडौँ उपत्यकामा रहेका प्रचीन चैत्यमध्ये यो सबैभन्दा ठूलो भएकाले बौद्धनाथ क्षेत्रमा पर्यटक आकर्षित गर्न विभिन्न कार्ययोजना बनाइएको छ ।
विसं २०७२ मा गएको भूकम्पका कारण क्षति पुगेको चैत्य तथा त्यसका हर्मिका, त्रयोदश भुवन, गजुर मर्मतसम्भार गरिएको छ ।
प्रतिक्रिया