अर्जुन कुलुङ र ङिमा शेर्पालाई एभरेस्ट म्याराथनको उपाधि
![अर्जुन कुलुङ र ङिमा शेर्पालाई एभरेस्ट म्याराथनको उपाधि](https://snowberry.prixacdn.net/media/gallery_folder/ev_bJ2qTfvjgV_u4uedngyxqse9lmgiz4nxmu69laghit0t6pzkwawub5ajhlxvxiqeoy4hrh9_YVwzRtxQoG_j2ufuaip1fgeoihb6p750gnkslgranwgwnwt5upjammnzmgn41uf50c8hphu.jpg)
सोलुखुम्बु – सगरमाथा दिवसका अवसरमा आयोजित तेन्जिङ–हिलारी एभरेस्ट म्याराथनको उपाधि पुरुषतर्फ अर्जुन कुलुङ र महिलातर्फ ल्हाक्पा ङिमा शेर्पाले जितेका छन् ।
विश्वकै सबैभन्दा उच्च ठाउँमा दौडिँदै पुरुषतर्फ सोलुखुम्बुको महाकुलुङका कुलुङ र महिलातर्फ नेपाल प्रहरीकी शेर्पाले उपाधि जितेका हुन् ।
सगरमाथा आधार शिविरबाट सगरमाथा राष्ट्रिय निकुञ्जको कार्यालय नाम्चेसम्म ४२ दशमलव १९ किमिको दूरी कुलुङले तीन घण्टा ५२ मिनेट २ सेकेन्डमा पार गर्नुभयो ।
महिलातर्फ त्यही दूरी शेर्पाले चार घण्टा ४२ मिनेटमा पार गर्नुभयो । प्रतियोगितामा दुई सय १० जना धावक सहभागी रहेका आयोजकले जनाएको छ ।
सगरमाथामा पहिलो पटक एड्मन्ड हिलारी र तेन्जिङ नोर्गे शेर्पाले ७१ वर्षअघि सन् १९५३ मे २९ मा पाइला राखेको दिनको सम्झनामा हिमालयन एक्स्पिडिसन कम्पनी लिमिटेडले म्याराथन आयोजना गर्दै आएको छ ।
प्रतिक्रिया