मुगुमा पनि यार्सा सङ्कलन गर्न गएका दुई जनाको मृत्यु
![मुगुमा पनि यार्सा सङ्कलन गर्न गएका दुई जनाको मृत्यु](https://snowberry.prixacdn.net/media/gallery_folder/yarsa_uV7Qfgbfe1_hbz3axynkzpgctusoa2s72fdzm3rmcnng04rldvbw4hhvmks07hyzsdg4s45_mJ6PbqHWRl_kg0lo8uymyasbv6ztwbcx7kf6bs0lwr9remdkoq0duiazyh3asyyqiwizaqg_MrvWaUdQgT_hylyofrl2aldznhr1pgo2fnbpswcubvrvdyxpoxp0otqbbchrojzg8ugavzk_lZtSvU4AEe_cokozjufjcwu6o4ayaepaajqly0rieasn4wpzyrrreakyne4nnvy9fgay77v.jpeg)
मुगु - मुगुमा यार्सागुम्बा टिप्न गएका दुई जनाको लेक लागेर मृत्यु भएको छ । पाटन ठूलो कोइकिमा लेक लागेर बिरामी परेपछि उपचारका लागि मुगु गाउँ ल्याइएका छायानाथ रारा नगरपालिका– १२ शोभा गाउँका २९ वर्षीय मानबहादुर बुढा र सोही नगरपालिकाको कम्फा गाउँका शोभान बुढाको मृत्यु भएको सशस्त्र प्रहरी जवान तिलक बढुवालले मुगु गाउँबाट फोनमा जानकारी दिनुभयो ।
जिल्ला प्रहरी कार्यालय मुगुका प्रहरी नायब उपरीक्षक वीरेन्द्र थापाले पनि यार्सा सङ्कलनमा गएका दुई जनाको लेक लागेर मृत्यु भएको र एक जना सिकिस्त बिरामी भएका बताउनुभयो ।
सिकिस्त बिरामी भएका कम्फा गाउँका राजबहादुर सावतलाई उपचारका निम्ति मुगु पाटनबाट मुगुगाउँतर्फ ल्याउँदै गरिएको उहाँले बताउनुभयो ।
गत वर्ष यार्सा टिप्न पाटन पुगेका तीन जनाको हिउँ पहिरोमा परेर र एक जनाको लडेर मृत्यु भएको थियो । मुगुका २४ भन्दा बढी क्षेत्रमा यार्सा सङ्कलन गर्न मुगुमकार्मारोङ्ग गाउँपालिकाले गत वैशाख २५ गते प्रवेश खुला गरेको हो ।
प्रतिक्रिया