नवनियुक्त प्रधानमन्त्री केपी शर्मा ओलीले आज शपथ लिँदै
आजै मन्त्रिपरिषदलाई पूर्णता दिने तयारी
![नवनियुक्त प्रधानमन्त्री केपी शर्मा ओलीले आज शपथ लिँदै](https://snowberry.prixacdn.net/media/gallery_folder/kp%252520oli_4ItcNc16ok_sfspfbod8m1oijc827pyfdsoao8e5plofjrjvqu3yvxdxs5qn5bd2amgufzy_hlwWM2t1h3_tjvug4ochxzokxgjvrtuzdb3uiohjpw5owsv0nbreo4z695wbvakloj8rxkb_DPVlQlUTYm_dzjvujog8hng4ajcmjvys7dqsdekz9fskkza4pmigufwdvhvgjbbzmdzhhyv.jpg)
काठमाण्डौ – नवनियुक्त प्रधानमन्त्री केपी शर्मा ओलीले आज शपथ लिँदै हुनुहुन्छ । संविधानको धारा ७६ (२) अनुसार हिजो प्रधानमन्त्रीमा नियुक्त हुनुभएका ओलीले आज बिहान ११ बजे राष्ट्रपति रामचन्द्र पौडेलबाट शपथ लिने कार्यक्रम छ ।
नेपाली कांग्रेसको समर्थनमा ओली चौथोपटक प्रधानमन्त्री बन्नुभएको हो । नवनियुक्त प्रधानमन्त्री ओलीले आज शपथ लिएसँगै मन्त्रिपरिषदलाई पूर्णता दिने कांग्रेस र एमालेको तयारी छ । यसको लागि आज बिहानैदेखि नेताहरु छलफलमा जुटेका छन् । दुई दलबीच एमालेले प्रधानमन्त्रीसहित सात र कांग्रेसले उपप्रधानमन्त्रीसहित आठ मन्त्रालय राख्ने गरी समझदारी बनेको छ । बाँकी मन्त्रालय साना दललाई बाँडफाँट गर्ने तयारी छ ।
कांग्रेसबाट नेता प्रकाशमान सिंहले उपप्रधानमन्त्रीसहित सरकारमा पार्टीको नेतृत्व गर्ने र एमालेबाट उपाध्यक्ष विष्णु पौडेल उपप्रधानमन्त्री तथा अर्थमन्त्री बन्ने निश्चितजस्तै भएको नेताहरुको भनाइ छ । नेताहरुका अनुसार कांग्रेसले गृह, परराष्ट्र, ऊर्जा, स्वास्थ्य, पर्यटन, सहरी विकास, कानुन र वन तथा वातावरण मन्त्रालय लिनेछ ।
एमालेले अर्थ, भौतिक योजना तथा पूर्वाधार विकास, सञ्चार, शिक्षा, उद्योग, संघीय मामिला तथा सामान्य प्रशासन र भूमि व्यवस्था मन्त्रालय लिने प्रारम्भिक समझदारी बनेको छ । तर, अन्तिम टुङ्गो भने लाग्न बाँकी छ ।
कांग्रेसबाट रमेश लेखक, आरजु राणा, प्रदीप पौडेल, अजय चौरासिया, जीवन परियार, किशोरसिंह राठौर, बद्री पाण्डे, तेजुलाल चौधरी, रामनाथ अधिकारी, हृदयराम थानी र दीपक खड्का तथा एमालेबाट योगेश भट्टराई, गोकुल बाँस्कोटा, जुली महतो, विद्या भट्टराई, दामोदर भण्डारी, पदम गिरी, रघुवीर महासेठ, छविलाल विश्वकर्मा, कृष्णगोपाल श्रेष्ठ, ऋषिकेश पोखरेल र एलपी सावाँ लिम्बु मन्त्रीका दाबेदार छन् ।
प्रतिक्रिया