बाढीले ४२ परिवार विस्थापित
![बाढीले ४२ परिवार विस्थापित](https://snowberry.prixacdn.net/media/gallery_folder/bisthapit_daCP8BwnIJ_qsu8s7ch6niq0iltujddq0axantxcpuxakoatibk89hqtkkl6qd3mcbvrmgj_0y1s18oF01_wflw8vx8asb2l0sutwjdbrhcnjfnwvysp1wztatvvevjoy9kt777yyz4rkw1.jpg)
रुकुमपश्चिम: रुकुमपश्चिमको आठविसकोट नगरपालिकाका ४२ घर परिवार विस्थापित भएका छन् । बाढीको कारण यहाँका ४२ परिवार विस्थापित भएका हुन् ।
स्थानीय गिजागार खोलाको कारण वडा नम्बर १२ को झिन्चौरका २२ घरपरिवार र वडा नम्बर ११ को सिमबजारका २० घरपरिवार विस्थापित भएका हुन्। झिन्चौर र सिमबजार करिब ६० घर बाढी पहिरोको उच्च जोखिममा छन् ।
झिन्चौरका विस्थापित घरपरिवारलाई स्थानीय कर्णाली वेभरेज ईन्डष्ट्रिज प्रा.लि.को परिसरमा सारिएको जिल्ला प्रहरी कार्यालयका प्रहरी नायव उपरीक्षक नवराज पोखरेलले जानकारी दिनुभयो । सिमबजारका विस्थापितहरू राडी बजार र गोईरीमा बसेका छन् । उनीहरूको आफन्तको घरमा सरेको बताइएको छ ।
रेडक्रसद्वारा राहत वितरण
यसैबिच नेपाल रेडक्रस सोसाइटी रुकुम पश्चिम शाखाले घटनास्थलमै पुगेर बाढी पीडितहरूलाई राहत उपलब्ध गराएको छ । रेडक्रसका जिल्ला सभापति रमा गौतमका अनुसार २१ घर परिवारलाई तत्काल आवश्यक पर्ने राहत सामग्रीहरू उपलब्ध गराइएको हो । ९२ वटा म्याट, २१ थान त्रिपाल, ५० थान डोरी, २१ थान डिग्निटी किडका सामग्रीहरू बाढी पीडित परिवारलाई उपलब्ध गराइएको सभापति गौतमले जानकारी दिनुभयो ।
बाढी प्रभावित परिवारलाई राहत वितरणका साथै रेडक्रसको टोलीले उद्धारको कार्यमा समेत सहयोग गरेको छ । बाढीले घर क्षति गरेपछि घरभित्रका सामग्रीहरूको व्यवस्थापन, परिवारलाई सुरक्षित स्थानमा सार्न रेडक्रसका स्वयंमसेवकहरु परिचालन गरिएको छ ।
प्रतिक्रिया