बाढीपीडितलाई तत्काल राहत व्यवस्थापन गरिने
![बाढीपीडितलाई तत्काल राहत व्यवस्थापन गरिने](https://snowberry.prixacdn.net/media/gallery_folder/mantri%2520kc_qZJhTtLE8w_edvzywtscjy9xxkvuegv6dhoxmk78p0yxcjx7qnpfzkqe08oyryzbbnbadfl_HPmfxYd2s5_zqiakeie82k6ygxmn19jpkrol4jftdtmxq3ts2qb45zooxz6glttohsq6fri.jpg)
रुकुमपश्चिम - कर्णाली प्रदेशका आर्थिक मामिला तथा योजनामन्त्री महेन्द्र केसीले आठबिसकोट नगरपालिकाका बाढीपीडितलाई तत्काल राहतको व्यवस्थापन गरिने बताउनुभएको छ ।
आठबिसकोट– ११ र १२ का बाढी प्रभावित क्षेत्रको स्थलगत निरिक्षण पछि स्थानीयसँग छलफल गर्दै बाढीपीडितलाई तत्काल राहतको व्यवस्थापन गरिने उल्लेख गर्नुभयो ।
सोेमबार राति आठबिसकोट–११ को सिमबजार र वडा नं १२ को झिनचौरमा आएको बाढीले मानवीयसँगै भौतिक संरचनामा क्षति पु¥याएको थियो । प्रभावित स्थानको अवलोकन गर्नुका साथै बाढीमा परी घाइते भएकाको स्वास्थ्य अवस्थाबारे जानकारी लिनुभएको मन्त्रीका प्रमुख स्वकीय सचिव सुन्दर शर्माले बताउनुभयो ।
बाढीले निम्त्याएको घटनाको विस्तृत अध्ययन, उद्धार, राहत तथा व्यवस्थापनका लागि प्रदेश सरकार प्रतिवद्ध रहेको बताउँदै तत्काल सरकारले राहतको व्यवस्थापन गर्ने मन्त्री केसीले प्रतिबद्धता जनाउनुभयो । साथै घाइते भएकाहरुको उपचारमा सरकारले सहयोग गर्ने उहाँले बताउनुभयो । मनसुनजन्य विपद्बाट सुरक्षित रहन सर्तकता अपनाउन पनि उहाँले जिल्लावासीलाई आग्रह गर्नुभयो ।
सोमबार राति गिजागार खोलामा आएको बाढीले खोला किनारमा अस्थायी आवासमा बसोबास गर्ने दश वर्षीया हितमाया पुन, आठ वर्षीया धनुसा पुन र चार वर्षीया मनिषा सार्कीको मृत्यु भएको थियो । बाढीले बगाउँदा सोही ठाउँका ३८ वर्षीय डिल्लीबहादुर बुढाथोकी बेपत्ता हुनुभएको छ । उहाँको खोजी भइरहेको प्रहरीले जनाएको छ ।
बाढीका कारण नौ जना घाइते भएका छन्भने दर्जनबढी घर क्षति भएका छन् । साथै सडक, विद्युत्, खानेपानीका पाइपमा क्षति पुग्दा स्थानीयलाई समस्या भएको आठबिसकोट नगरपालिकाले जनाएको छ ।
प्रतिक्रिया