सुदूरपश्चिम प्रदेशमा आज नयाँ सरकार गठन हुँदै

काठमाडौँ  – सुदूरपश्चिम प्रदेशमा आज नयाँ सरकार गठन हुँदैछ । अस्ति शुक्रवार मुख्यमन्त्री दीर्घबहादुर सोडारीले राजीनामा दिएपछि प्रदेश प्रमुख नजिर मियाँले आज बेलुका ५ बजेसम्मको लागि मुख्यमन्त्रीमा दाबी पेस गर्न समय दिनुभएको थियो ।

केन्द्रमा भएको नयाँ सत्ता समिकरण र सहमति अनुसार सुदूरपश्चिम प्रदेशको मुख्यमन्त्री कांग्रेसले पाउनेछ । कांग्रेस प्रदेश संसदीय दलका नेता कमलबहादुर शाहले मुख्यमन्त्रीमा दाबी पेस गर्ने तयारी छ । आवश्यक निर्णय गर्न अहिले संसदीय दलको बैठक बस्दैछ ।

बैठकले पार्टीबाट मन्त्री बन्नेको नाम पनि टुङ्गो लगाउनेछ । सुदूरपश्चिम प्रदेशमा ५३ जना प्रदेश सभा सदस्य छन् । मुख्यमन्त्रीलाई बहुमत जुटाउन २७ सांसद आवश्यक पर्छ । कांग्रेसका १८ र एमालेका ११ सांसद हुँदा दुई सहज बहुमत पुग्छ ।

नागरिक उन्मुक्ति पार्टीले पनि समर्थन गर्ने जनाएको छ । आज पाँच बजेभित्र मुख्यमन्त्रीमा दाबी पेश गर्ने र आजै मन्त्रीमण्डल बिस्तार गर्ने तयारी गरिएको छ । नागरिक उन्मुक्ति पार्टीले लक्ष्मणकिशोर चौधरीलाई मन्त्री बनाउने भएको छ । शाहले यसअघि १४ महिना मुख्यमन्त्रीको जिम्मेवारी सम्हाल्नुभएको थियो ।