सुर्खेतमा गाडी दुर्घटना हुँदा एक जनाको मृत्यु

सुर्खेत -  सुर्खेतमा गाडी दुर्घटना हुँदा एक जनाको ज्यान गएको छ । आज बिहान जुम्लाबाट सुर्खेततर्फ आइरहेको गाडी नम्बर कर्णाली प्रदेश ०२००१ ख १०१४ गाडी बराहताल गाउँपालिका - ८ हुड्केमा दुर्घटनामा परेको प्रहरीले जनाएको छ ।

दुर्घटनामा परी दैलेखको ठाटीकाँध गाउँपालिका -४ का ३५ वर्षीय दीपक शाहीको मृत्यु भएको छ। गम्भीर घाइते उनलाई उपचारको लागि प्रदेश अस्पताल सुर्खेत पुर्‍याइएकोमा चिकित्सकले लगत्तै मृत घोषित गरेका हुन् ।

जिल्ला प्रहरी कार्यालय सुर्खेतले दुर्घटनामा अन्य पाँच जना घाइते भएको जनाएको छ। घाइते सबैको अवस्था सामान्य रहेको छ। गाडीमा बच्चासहित २९ जना सवार थिए। घटनाबारे अनुसन्धान भइरहेको प्रहरीले जनाएको छ।