दैलेखमा घरबाट भागेका दुई किशोरकिशोरी मृत अवस्थामा फेला

दैलेख -   दैलेखमा एक हप्ता अघि घरबाट भागेका दुई किशोरकिशोरीको शव जङ्गलमा फेला परेको छ। मृतकहरूमा भगवतीमाई गाउँपालिका–४, मन्घर टोलका १७ वर्षीया शर्मिला थापा र १७ वर्षीय मानसिंह विक रहेका छन् ।

जिल्ला प्रहरी कार्यालय दैलेखका प्रहरी प्रमुख, डीएसपी सुनिल दाहालका अनुसार, उनीहरू पुष १३ गते (अघिल्लो शनिवार) घरबाट भागेका थिए। घरदेखि केही टाढा रहेको जङ्गलमा शनिवार बिहान दुबैलाई मृत अवस्थामा फेला पारिएको हो ।

डीएसपी दाहालले प्रारम्भिक अनुसन्धानमा दुबैको प्रेम सम्बन्ध रहेको र परिवारले विवाहका लागि अनुमति नदिएको कारणले यो घटना भएको हुनसक्ने आशंका व्यक्त गरेका छन्। यद्यपि घटनाको वास्तविक कारण पत्ता लगाउन थप अनुसन्धान भइरहेको उनले जानकारी दिए ।

मृतक किशोरकिशोरी भगवतीमाई गाउँपालिकास्थित कालिका माध्यमिक विद्यालयमा अध्ययनरत थिए। शर्मिला थापा कक्षा ९ मा अध्ययनरत थिइन् भने मानसिंह विक कक्षा १० का विद्यार्थी थिए।