भारतबाट अबदेखि १२ घण्टा मात्रै बिजुली आपूर्ति हुने

काठमाडौँ –   नेपाल विद्युत् प्राधिकरणले भारतबाट आयात गर्दै आएको बिजुली आजबाट सोलार समय अर्थात् १२ घण्टा मात्रै आपूर्ति हुने भएको छ । विद्युत् आपूर्ति नियमित गरेर लोडसेडिङ हुन नदिन प्राधिकरणले भारतबाट बिजुली किन्ने गरेको छ।

भारतबाट आउने बिजुली कटौतीमा परेपछि लामो समयपछि नेपालमा फेरि लोडसेडिङ हुनसक्ने समेत चर्चा छ । तर, भारतबाट आपूर्ति हुने बिजुलीको समयमा कटौती हुँदा पनि लोडसेडिङ भने नहुने नेपाल विद्युत् प्राधिकरणले जनाएको छ ।

प्राधिकरणले अहिले भारतबाट दैनिक ६ सय मेगावाटभन्दा बढी बिजुली आयात गर्दै आएको छ । प्राधिकरणका प्रवक्ता चन्दनकुमार घोषले भारतबाट आपूर्ति हुने बिजुली गत वर्षको यही समयमा पनि अहिले जस्तै आइरहेको भन्दै आपूर्ति समय कटौती भए पनि समस्या हुन नदिने बताउनुभयो  । 

‘हामीसँग वैकल्पिक धेरै व्यवस्था छन्, आरओआर र कुलेखानी छ, ती आयोजनाबाट ४ सय मेगावाट थपिन्छ’, प्रवक्ता घोषले भन्नुभयो  । उहाँकाअनुसार प्राधिकरणले ठूला उद्योगलाई पिक आओरको समयमा बिजुली आपूर्ति नगर्ने समझदारी गरेको छ । त्यसअनुसार तराई क्षेत्रका प्रसारण लाइन व्यवस्थित नभएका केही उद्योग प्रभावित हुने बताइएको छ ।

भारतबाट १२ घण्टाभन्दा बढी समय बिजुली आपूर्ति नहुँदा पिक आओरमा औद्योगिक क्षेत्रका केही सीमित उद्योगमा सम्झौताअनुसार उपलब्ध नहुने प्रवक्ता घोषले बताएका छन् । उनकाअनुसार त्यो समय साँझ ५ बजेदेखि राती ११ बजेसम्म पिक आओरमा लागु हुन्छ ।

‘सम्झौताअनुसार पिक आओरमा दिन पाइँदैन, उहाँहरूले त्यसमा एग्रिमेन्ट पनि गर्नुभएको छ, समस्त उद्योगहरूमा कुनै समस्या हुँदैन’, उहाँ भन्नुहुन्छ, ‘हाम्रो पावरहाउस हिमाली क्षेत्रमा छ, ठूला उद्योगहरू एकदमै तल छ, त्यसको लागि त प्रसारण लाइन पनि त्यहीअनुसारको चाहियो, भौगोलिक कारणले गर्दाखेरि कुनै–कुनै स्थानमा पुर्‍याउन नसकिने हुन्छ ।’

तर, काठमाडौं उपत्यका, मोरङ, बुटवल लगायतका औद्योगिक क्षेत्रमा भने समस्या नपर्ने प्रवक्ता घोषले बताउनुभएको छ । पछिल्लो हप्तामा विभिन्न आयोजनाबाट राष्ट्रिय प्रसारण लाइनमा २० मेगावाट थपिएको छ । बागलुङ, म्याग्दी लगायतका जिल्लामा सञ्चालित केही पावरहाउसबाट छिट्टै थप बिजुली राष्ट्रिय प्रसारण लाइनमा जोडिने अवस्था रहेको उहाँले बताउनुभयो ।