परम्परागत अभ्यासहरूको बारेमा अभिमुखीकरण कार्यक्रम

जुम्ला -  जुम्लाको चन्दनाथ नगरपालिकामा परम्परागत अभ्यासहरूको बारेमा अभिमुखीकरण कार्यक्रम गरिएको छ । एइआईएन लक्जेम्बर्गको साझेदारी, सोेसेक नेपालद्वारा जुम्लामा संचालित बिहानी परियोजनाको आयोजनामा हानीकारक परम्परागत अभ्यासहरुका बारेमा अभिमुखीकरण कार्यक्रम गरिएको हो । 

कार्यक्रमको उद्देश्य बालविवाह, महिनावारी विभेद, दाइजो प्रथा, र लिङ्ग पहिचान गरी गर्भपतन जस्ता हानिकारक परम्परागत अभ्यासहरूको बारेमा अभिमुखीकरण कार्यक्रममार्फ समुदायलाई सचेत गराइएको बिहानी परियोजना जुम्लाले जनाएको छ ।

कार्यक्रमको अध्यक्षता प्रदेश कमिटी सदस्य श्री लक्ष्मी सुनारले गर्नुभएको थियो  । कार्यक्रम चन्दननाथ नगरपालिका वडा नं. – ४ को माथिल्लो सुनार टोलमा सम्पन्न भएको थियो ।

कार्यक्रममा सहभागीहरूलाई हानिकारक परम्परागत अभ्यासहरूको बारेमा विस्तृत जानकारी दिइएको थियो, जसले समग्र समाजमा सकारात्मक परिवर्तन ल्याउने अपेक्षा गरिएको छ। यस अभिमुखीकरण कार्यक्रममा महिलाहरूको हक, समानता र स्वास्थ्यमा आधारित विभिन्न जानकारी प्रस्तुत गरिएका थिए ।

कार्यक्रममा स्थानीय जनताले पनि सक्रिय सहभागिता जनाए र यस्ता अभ्यासहरूको बिरुद्ध सामाजिक चेतना फैलाउने प्रतिवद्धता जनाएका छन् ।