मध्यपश्चिम विश्वविद्यालय स्ववियु निर्वाचन : नेविसंघ प्यानल विजय

सुर्खेत -   मध्यपश्चिम विश्वविद्यालयको स्वतन्त्र विद्यार्थी युनियन (स्ववियु) को नेतृत्व नेपाली कांग्रेसनिकट नेपाल विद्यार्थी संघ (नेविसंघ) प्यानलले हासिल गरेको छ। सोमबार सम्पन्न निर्वाचनमा नेविसंघका विवेक खड्का नेतृत्वको प्यानलले बहुमत प्राप्त गरेको हो ।

अध्यक्ष पदमा खड्काले नेकपा एमालेनिकट अनेरास्ववियुका जगतजंग शाहीलाई पराजित गर्दै १ हजार १८७ मत प्राप्त गरी विजयी हुनुभएको छ । उहाँका  प्रतिद्वन्द्वी शाहीले ९०७ मत प्राप्त गर्नुभयो । अन्य प्रत्यासीहरूमध्ये प्रकाश विकले २७५ र मिलन बिसीले २३१ मत प्राप्त गरे। कुल ४ हजार ३८३ मतदातामध्ये २ हजार ८६४ जनाले मतदान गरेका थिए।

मध्यपश्चिम विश्वविद्यालयको स्ववियु कार्यसमिति अध्यक्ष, सचिव, कोषाध्यक्षसहित १७ सदस्यीय हुने प्रावधान छ। पहिलो स्ववियु निर्वाचन २०७३ साल भदौ ८ गते सम्पन्न भएको थियो, जसमा कांग्रेसनिकट नेविसंघका झक्कबहादुर शाही अध्यक्षमा निर्वाचित हुनुभएको थियो ।

तर, २०७६ मा कार्यकाल समाप्त भएपनि स्ववियु नेतृत्वविहीन बन्यो । तत्कालीन उपकुलपति उपेन्द्र कोइरालाले २०७५ मंसिरमा स्ववियु विघटन गर्नुभएको थियो  । विश्वविद्यालय प्रशासनविरुद्ध स्ववियुले विरोध जनाएपछि उक्त कदम उठाइएको थियो।

पछि, २०७६ मा नन्दबहादुर सिंह उपकुलपति नियुक्त भएपछि पनि स्ववियु निर्वाचन प्राथमिकतामा परेन। २०७९ मा निर्वाचन मिति तय भएपनि कानुनी जटिलताका कारण प्रक्रिया रोकिएको थियो। पुनः २०८१ भदौमा निर्वाचनको तयारी भएपनि विद्यार्थीहरूले नामावली समावेश नभएको भन्दै अदालतमा रिट दायर गरेपछि निर्वाचन स्थगित भएको थियो।

एमयू केन्द्रीय क्याम्पस लामो समयदेखि नेतृत्वविहीन भएपछि उच्च अदालत सुर्खेतले २०८१ माघमा २० चैतभित्र निर्वाचन सम्पन्न गर्न आदेश दिएको थियो । सोही आदेशअनुसार विश्वविद्यालय प्रशासनले ७ चैतबाट निर्वाचन प्रक्रिया अघि बढाएको थियो। विश्वविद्यालयअन्तर्गतका आंगिक क्याम्पसमा भने २०७९ चैतमै निर्वाचन सम्पन्न भइसकेको छ।

यस पटकको निर्वाचनले मध्यपश्चिम विश्वविद्यालयको विद्यार्थी नेतृत्व पुनःस्थापित गरेको छ। अब नव निर्वाचित नेतृत्वले विश्वविद्यालयका विद्यार्थीहरूको हकहित र शैक्षिक सुधारका विषयमा कस्तो भूमिका खेल्छ, त्यसतर्फ विद्यार्थी समुदायको चासो रहनेछ।