काठमाडौँमा ‘कनेक्टिङ कर्णाली’ अभियानअन्तर्गत जुम्लाको प्रर्दशनी सुरू

काठमाडौँ –    संघीय राजधानी काठमाडौंलाई कर्णालीसँग जोड्ने उद्देश्यसहित सञ्चालित ‘कनेक्टिङ कर्णाली’ अभियानको चौथो शृङ्खलाअन्तर्गत जुम्लाको तस्वीर, भिडियो तथा स्थानीय उत्पादनको प्रदर्शनी सुरु गरिएको छ।

मनघरी फाउन्डेशनको आयोजनामा शुक्रबारदेखि नयाँ बानेश्वरमा सुरु भएको प्रदर्शनीमा जुम्लाको धार्मिक, पुरातात्त्विक, प्राकृतिक सुन्दरता झल्काउने २१ वटा तस्वीर, कर्णालीलाई केन्द्रबिन्दु बनाएर निर्माण गरिएका भिडियो सामग्री, साथै जुम्लाको स्थानीय उत्पादनहरू प्रदर्शनीमा राखिएको छ।

शब्द, दृश्य, चित्र तथा उत्पादनका माध्यमबाट कर्णालीको मौलिकता संघीय राजधानीमा प्रस्तुत गर्ने लक्ष्यसहित सञ्चालन गरिएको ‘कनेक्टिङ कर्णाली’ अभियानअन्तर्गत यसअघि दैलेख, डोल्पा र मुगु जिल्लाका तस्वीर, भिडियो तथा स्थानीय उत्पादनको प्रदर्शनी सम्पन्न भइसकेको मनघरी फाउन्डेसनका अध्यक्ष भरबन्धु थापाले  जानकारी दिनुभयो ।

उहाँका अनुसार प्रदर्शनीमा राखिएका तस्वीरहरू एलपी देवकोटा, विशाल सुनार, कुबेरराज कार्की, दीपक बुढथापा र आयोजकद्वारा खिचिएका हुन् । यी तस्वीरहरूले जुम्लाको संस्कृति, प्रकृति, जनजीवन र धार्मिक सम्पदाहरूलाई उजागर गरेका छन्।

मनघरी फाउन्डेशनका अध्यक्ष भरतबन्धु थापाका अनुसार, ‘कर्णाली चिनाउने अभियान’ निरन्तर अगाडि बढिरहेको छ। कर्णालीको समृद्ध इतिहास, संस्कृति तथा प्राकृतिक सम्पदालाई बाह्य तथा आन्तरिक पर्यटकहरू माझ पुर्याउने उद्देश्यले यो अभियानको सुरुवात गरिएको हो ।

नयाँ बानेश्वरमा आयोजना गरिएको जुम्ला विशेष प्रदर्शनी शनिबारसम्म जारी रहनेछ। संघीय राजधानीमा कर्णालीलाई थप नजिक ल्याउने उद्देश्यसहित आयोजना गरिएको प्रदर्शनीले स्थानीय तथा बाह्य पर्यटकहरूलाई जुम्लाको समृद्ध इतिहास, संस्कृति र सम्भावनाबारे जानकारी दिने विश्वास गरिएको छ। यो प्रदशनी २२ गत गते (आज) र भोलीसम्म संचालन हुनेछ ।