ठाटिकाँधमा बजार अनुगमन, म्याद नाघेका सामान नष्ट

ठाटीकाँध –   दैलेखको ठाटीकाँध गाउँपालिकामा बजार अनुगमन गरिएको छ । अनुगमनको पहिलो चरणअन्तर्गत गाउँपालिकाको केन्द्रस्थित ठाटिकाँध बजारमा अनुगमन गरिएको हो । 

गाउँपालिका उपाध्यक्ष देवीराम बडुवालको संयोजन तथा प्रमुख प्रशासकीय अधिकृत तुलसीप्रसाद उपाध्यायको नेतृत्वमा भएको अनुगमनमा इलाका प्रशासन कार्यालय दुल्लु, उद्योग तथा उपभोक्ता हित संरक्षण कार्यालय दैलेख तथा विभिन्न शाखा प्रमुखहरू सहभागी थिए । 

टोलीले बजार क्षेत्रका खाद्यान्न तथा खुद्रा पसल, होटेल, मेडिकललगायत व्यवसायहरूको सूक्ष्म अनुगमन गर्दै म्याद नाघेका खाद्य वस्तुहरूको जाँच, व्यवसाय दर्ता तथा कर प्रणालीको पालना भएको छरछैन भन्ने विषयमा समेत निगरानी गरेको थियो ।

अनुगमनका क्रममा म्याद नाघेका उपभोग्य वस्तुहरू जफत गरी व्यवसायीलाई आवश्यक निर्देशन प्रदान गरिएको छ भने बरामद सामग्रीहरूलाई सार्वजनिक रूपमा नष्ट गरिएको छ । उपाध्यक्ष बडुवालले बजार अनुगमनलाई प्रभावकारी बनाइने प्रतिबद्धता व्यक्त गर्दै आगामी दिनमा गाउँपालिकाका अन्य बजारहरूमा पनि निरन्तर अनुगमन गर्ने जानकारी दिनुभयो ।

बजार अनुगमन गर्दा स्थानियहरू अनुगमनबाट उत्साहित देखिएका छन्। उनीहरूले बजारमा उपभोक्ता सुरक्षाका लागि यस्ता कदम आवश्यक रहेको बताउँदै गाउँपालिकाको पहलको प्रशंसा गरेका छन्।