महाबुमा महिलाहरूका लागि वित्तीय तथा व्यवसायिक साक्षरता तालिम

महाबु  –   दैलेखको महाबु गाउँपालिकामा महिलाहरूका लागि वित्तीय तथा व्यवसायिक साक्षरता तालिम सम्पन्न भएको छ । गाउँपालिकाको वडा नम्बर –५, काँसिकाँधका महिलाहरूलाई वित्तीय शिक्षा तथा व्यवसायिक साक्षरता सम्बन्धी तालिम प्रदान गरिएको छ। ग्रामीण क्षेत्रमा पुरुषहरू कामको सिलसिलामा घर बाहिर रहने र महिलाहरू घरधन्दाको मुख्य जिम्मेवारी बहन गर्ने अवस्थालाई मध्यनजर गर्दै, उनीहरूलाई बचत, पैसाको उचित प्रयोग तथा आयआर्जनका उपायहरूसम्बन्धी शिक्षा प्रदान गरिएको हो।

नेपाल सरकारको पशुपन्छी मन्त्रालय अन्तर्गतको कृषि क्षेत्र विकास कार्यक्रम तथा महाबु गाउँपालिकाको सहकार्यमा आयोजित यस तालिममा १७१ घरका महिलाहरू सहभागी भएका थिए। उनीहरूलाई छ वटा समूहमा विभाजन गरी तीन महिनासम्म ४० कक्षा सञ्चालन गरिएको थियो। साथै, महिलाहरूलाई बाख्रापालन व्यवसायमा संलग्न गराउन प्रति परिवार बाख्रा खोर निर्माणका लागि सहयोग उपलब्ध गराइएको छ।

तालिम समापनका अवसरमा महाबु गाउँपालिका उपाध्यक्ष मञ्जु शर्मा पाण्डेयले महिलाहरूलाई आर्थिक रूपमा सबल बनाउन वित्तीय तथा व्यवसायिक साक्षरताको प्रभावकारीता उल्लेख गर्दै, समाजमा अझै पनि पुरुषहरूलाई बढी अधिकार प्राप्त भएको विषयमा दुःख व्यक्त गर्नुभयो । उहाँले महिलाहरूको आत्मनिर्भरताका लागि यस्ता कार्यक्रमलाई निरन्तरता दिने प्रतिबद्धता व्यक्त गर्नुभयो ।

त्यस्तै, वडा नं। ५ का वडाध्यक्ष दिप बहादुर शाहीले वडालाई पूर्ण रूपमा पोषणमैत्री र सरसफाइयुक्त बनाउँदै साक्षरता वृद्धिका लागि कार्यक्रम प्रभावकारी भएको बताउनुभयो।

तालिम समापन समारोहमा सहभागी महिलाहरूले घरायसी पोषणका विभिन्न परिकारहरूको प्रदर्शनी समेत गरेका थिए। महिलाहरूको वित्तीय साक्षरता वृद्धि तथा उनीहरूलाई आत्मनिर्भर बनाउन गरिएको यो प्रयास गाउँपालिकाका लागि महत्वपूर्ण उपलब्धि सावित भएको आयोजक पक्षको भनाइ छ।