'विनियोजन विधेयकमा सबै क्षेत्र समेटिएको छ कार्यान्वयनमा जोड दिन आवश्यक'

काठमाडौँ –   प्रतिनिधि सभा सदस्य सिता कुमारी रानाले आर्थिक वर्ष २०८२÷०८३ का लागि प्रस्तुत विनियोजन विधेयकमा सबै क्षेत्र समेटिएको बताउँदै त्यसको प्रभावकारी कार्यान्वयन र पारदर्शी अनुगमनमा सरकारको ध्यान केन्द्रित हुनुपर्ने बताउनुभएको छ ।

शुक्रवार संसदमा विधेयकमाथिको छलफलमा बोल्दै सांसद रानाले मौलिक हक, समृद्ध नेपाल–सुखी नेपालीको आकांक्षा, व्यवसायमैत्री वातावरण, सामाजिक सुरक्षा र सुशासनजस्ता सिद्धान्त समेटिनु सकारात्मक पक्ष भएको उल्लेख गर्नुभयो ।

तर, यस्ता प्राथमिकता केवल कागजमै सीमित नहोस् भन्दै उहाँले विगतका अनुभव दोहोरिन नदिन आग्रह गर्नुभयो । कर्णालीको प्रतिनिधित्व गर्दै सांसद रानाले कर्णालीमा सडक, पर्यटन, कृषि, शिक्षा, स्वास्थ्य र रोजगारीका ठोस कार्यक्रम ल्याउनुपर्ने, दैलेखमा भूमि समस्या समाधान तथा पेट्रोलियम उत्खनन नियमित गर्नुपर्ने आवश्यकता औँल्याउनुभयो।

“विधेयक सैद्धान्तिक रूपमा सन्तुलित छ,” सांसद रानाले भन्नुभयो, “अब यसको प्रभावकारी कार्यान्वयनमा सरकार गम्भीर हुनुपर्छ।”