हिमालय माविमा ‘हेलो अभिभावक कार्यक्रम’ सुरु

दैलेख: हिमालय माध्यमिक विद्यालय, तिजको डाँडामा ‘हेलो अभिभावक कार्यक्रम’को औपचारिक रुपमा सुरुवात गरिएको छ । विहीबार देखि विद्यालय प्रशासन, शिक्षक, अभिभावक र विद्यार्थीबीच त्रिपक्षीय संवाद, समन्वय र सहकार्यलाई अझ प्रभावकारी बनाउन उद्देश्यसहित कार्यक्रम थालनी गरिएको विद्यालयले जनाएको छ ।
विद्यालयका प्रधानाध्यापक हर्क विकका अनुसार पछिल्लो समय विद्यालयले एकपछि अर्को उल्लेखनीय काम गर्दै आएको छ । उनले भने, “विद्यालयलाई आधुनिक र अभिभावक–मैत्री बनाउन यो कार्यक्रम सुरु गरिएको हो । विद्यालय नआउने बालबालिकाका कारण बुझ्न र अभिभावकसँग प्रत्यक्ष कुराकानी गर्न यसले महत्त्वपूर्ण भूमिका खेल्नेछ । साथै, विद्यालयको गुणस्तर अभिवृद्धिमा समेत यसले सहयोग पुग्नेछ भन्ने विश्वास लिएका छौँ।”

यस कार्यक्रममार्फत विद्यार्थीहरूको शैक्षिक प्रगति, सिकाइ वातावरण तथा व्यवहार सुधारबारे शिक्षक र अभिभावकबीच नियमित छलफल र सुझाव आदानप्रदान हुने अपेक्षा गरिएको छ । अभिभावकसँग प्रत्यक्ष सम्पर्क राख्न विद्यालयले विशेष फोन नम्बर ९८५८०३२९८० समेत सार्वजनिक गरेको छ । कार्यालय समयमा उक्त नम्बरमा सम्पर्क गरी सुझाव, सल्लाह वा प्रश्नहरू राख्न सकिने विद्यालय प्रशासनले जनाएको छ ।
प्रधानाध्यापक विकले थपे, “विद्यालयमा पठनपाठन मात्र नभई विद्यार्थी र अभिभावकबीच आत्मीय सम्बन्ध र सहकार्य बढाउनु हाम्रो प्रमुख उद्देश्य हो । यो कार्यक्रम विद्यालयको ऐतिहासिक कदम बन्नेछ भन्नेमा हामी ढुक्क छौँ।”
विद्यालय परिवारले ‘हेलो अभिभावक कार्यक्रम’ले विद्यालय र समुदायबीचको सम्बन्ध थप सुदृढ हुने र विद्यार्थीहरूको सर्वाङ्गीण विकासमा टेवा पुग्ने विश्वास व्यक्त गरेको छ ।