महिनावारीको समयमा त्रिपालमा बसेकी युवती र बालिकाको ढुङ्गा लागेर मृत्यु

फाइल तस्बिर

काठमाडौँ -  अछाममा महिनावारी भएर त्रिपालमुनि बसिरहेका एक युवती र एक बालिकाको माथिबाट खसेको ढुङ्गा लागेर मृत्यु भएको छ ।

पञ्चदेवल विनायक नगरपालिका–८ बारलामा माथिबाट खसेको ढुङ्गाले २८ वर्षीया निम खनाल र मङ्गलसेन नगरपालिका–६ की ७ वर्षीया कविता भण्डारीको ज्यान गएको जिल्ला प्रहरी कार्यालय अछामका प्रमुख डिएसपी ओम प्रकाश खनालले जानकारी दिए  ।

उक्त घटनामा मङ्गलसेन नगरपालिका–६ की रत्नकला भण्डारी गम्भीर घाइते भएकी छन् । उनको टाउकोमा चोट लागेकाले उपचारका लागि नेपालगञ्ज पठाउने तयारी भइरहेको प्रहरीले जनाएको छ ।

स्थानीय चुरकुली भन्ने स्थानमा महिनावारी भएको भन्दै घरको आँगनमै त्रिपाल टाँगेर सुतिरहेका तीन जनालाई अचानक माथिबाट खसेको ढुङ्गाले च्यापेको थियो । 

अछाममा पछिल्ला वर्षहरूमा स्थानीय प्रशासन र विभिन्न संघसंस्थाले छाउगोठ भत्काउने अभियान चलाए पनि पुरानो संस्कार र कुरीतिका कारण महिनावारी भएका महिलाहरू अझै पनि त्रिपाल मुनि वा ओडारमा बस्न बाध्य हुने गरेको देखिन्छ । महिनावारीका समयमा महिलाले घरभित्र नबस्ने, खाना पकाउन नपाउने र गाईबस्तु नछुने प्रथालाई त्यहाँ 'छाउपडी बार्ने' भनिन्छ ।