महिनावारी विरुद्धको नयाँ अभियान सोसेक कर्मचारी बिसीले गरिन् आफ्नै घरबाट सुरुवात

दैलेख – महिनावारी (रजश्वला) हुनुलाई अपमान होइन, उत्सवको रूपमा मनाउन सकिन्छ भन्ने सन्देश दिँदै स्मारिका बुढाले आफ्नो पहिलो महिनावारीलाई जन्मदिन सरह मनाएकी छिन् ।

शनिबार भएको उत्सवमा परिवार र छिमेकीको सहभागिता समेत थियो। स्मारिकाले महिनावारी आएको पहिलो दिन केक काटिन्, टीका–टालो भयो र परिवारका सबै सदस्यले खुशी साटेका थिए । अझ विशेष त, उनका ६२ वर्षका हजुरबुबा रतीमान वली (पुजारी समेत) ले नातिनीलाई टीका लगाइदिएका छन् ।

पहिलो महिनावारी भए लुक्ने लुकाउने हुन्छ, पहिलो महिनावारी लुकाउने होइन, परिवारसँगै मनाउने संस्कार सुरु भएको छ,” सोसेक नेपालमा कार्यरत स्मारिकाकी आमा मञ्जु वलीले भनिन् । मञ्जु ‘सशक्त महिला समृद्ध नेपाल’ परियोजनामा फिल्ड अफिसर पदमा कार्यरत छिन्।

नेपालका धेरै गाउँहरूमा अझै किशोरीलाई महिनावारी हुँदा घर बाहिर अलग्गै छाउगोठमा बस्न बाध्य गराइन्छ । यसबीच धेरैले सर्पदंश, आगलागी वा बलात्कारजस्ता घटनामा ज्यान गुमाएका छन्। यिनै समस्याको समाधानका लागि परिवारले यो नयाँ अभ्यास सुरु गरेको मञ्जुले बताइन्।