निर्मला हत्या प्रकरण : यातना दिएको र प्रमाण मेटाएको आरोपमा ६ प्रहरी हिरासतमा

थुनछेक बहस आजै सुरु हुने

फाल्गुन २३, कञ्चनपुर – बलात्कारपछि हत्या गरिएकी निर्मला पन्तको घटनामा यातना दिएको र प्रमाण नष्ट गरेको आरोपमा प्रहरी कर्मचारीविरुद्ध जिल्ला अदालतमा मुद्दा दायर भएको छ । मुद्दा दायरसँगै अदालतमा उपस्थित भएका ६ जनालाई प्रहरी हिरासतमा राखिएको छ । जिल्ला सरकारी वकिलको कार्यालयले बुधबार मुद्दा जिल्ला अदालतमा पेश गरेपछि आरोपितहरुलाई उपस्थित गराएर हिरासतमा राखिएको कञ्चनपुर जिल्ला अदालतका श्रेष्तेदार हरिकृष्ण अवस्थीले बताए।

उनका अनुसार मुद्दा दायर भएसँगै अदालतमा उपस्थित भएका ६ जनालाई प्रहरी हिरासतमा राखिएको छ। आजदेखि थुनछेक बहस सुरु भएको छ, उनले भने, त्यतिबेलासम्म सबै प्रहरी हिरासतमै हुन्छन्।

उनका अनुसार यातना र प्रमाण मेटाउने आरोप लागेका तत्कालीन एसपी डिल्लीराज बिष्ट र निलम्बित डिएसपी अंगुर जिसी अदालतमा उपस्थित भएनन्। यातना दिएको आरोपमा बिष्टसँगै निलम्बित डिएसपीद्वय अंगुर जिसी र ज्ञानबहादुर सेठी तथा प्रहरी निरीक्षक एकिन्द्र खड्काविरुद्ध मुद्दा दर्ता भएको थियो। प्रमाण मेटाएको आरोपमा यातनामा जोडिएका ४ सहित थप ४ जनाविरुद्ध मुद्दा दर्ता भएको हो।

निलम्बित डिएसपी सेठी, प्रहरी निरीक्षकबाट बर्खास्त गरिएका जगदीश भट्ट, निलम्बित प्रहरी निरीक्षक एकिन्द्र खड्का, सई रामसिंह धामी, सई हरिसिंह धामी र प्रहरी जवान चाँदनी साउद अदालतमा उपस्थित भएका हुन्। उनीहरुलाई प्रहरी हिरासतमा राखिएको छ। श्रेष्तेदार अवस्थीले ६ जनाको प्रारम्भिका बयान सकिएको बताए । उनले भने, अब सुनुवाइको प्रक्रिया सुरु हुनेछ ।

पुस ३ गते तत्कालीन एसपी बिष्टसहित ४ जनाका नाममा यातना कसुर र४ जनाका नाममा प्रमाण नष्ट गरेको आरोपमा जिल्ला प्रहरी कार्यालयमा जाहेरी परेको थियो। निर्मला घटनाको मुख्य अभियुक्तका रुपमा सार्वजनिक गरिएका दिलिप बिष्टका दाजु खडकले यातना कसुर र निर्मलाकी आमा दुर्गाले प्रमाण नष्ट गरेको भन्दै जाहेरी दिएकी थिइन्।