बीओपी स्थापना गर्न सशस्त्र प्रहरीको टोली छाङरु प्रस्थान

दार्चुला वैशाख ३१ गते । ब्यास गाउँपालिका-१ छाङ्गरुमा सशस्त्र प्रहरीको बोर्डर आउट पोस्ट (बीओपी) स्थापनाका लागि सशस्त्र प्रहरीका अतिरिक्त महानिरीक्षक नारायणबाबु थापा नेतृत्वको टोली बुधबार दिउँसो ब्यास प्रस्थान गरेको छ । सेनाको हेलिकप्टरमार्फत आवश्यक सामान बोकेर टोली ब्यास उडेको गरेको प्रमुख जिल्ला अधिकारी यदुनाथ पौडेलले बताए । 

सेनाको हेलिकप्टरमार्फत सशस्त्र प्रहरी बल नेपाल नम्बर ५० गुल्म दार्चुलाका गुल्मपति डम्बरबहादुर बिष्ट नेतृत्वमा सशस्त्र प्रहरीको टोली ब्यास गाउँपालिका-१ नितिकुण्डस्थित नेपाल प्रहरीको चौकीमा पहिलो चरणमा अवतरण गरेको थियो । दोस्रोपटक सशस्त्र प्रहरीका अतिरिक्त महानिरीक्षक थापा, प्रजिअ पौडेल, गृहमन्त्रीका सुरक्षा सल्लाहकार डा. इन्द्रजित राई लगायतको टोली ब्यास क्षेत्र उडेको हो ।

बुधबार काठमाडौंबाट दार्चुला पुगेको नेपाली सेनाको हेलिकप्टरले बीओपीका लागि आवश्यक सामान तथा सशस्त्र प्रहरी टोलीको बन्दोबस्तीका सामान ढुवानी गरिरहेको छ । सशस्त्र प्रहरी निरीक्षक लिलीबहादुर चन्दको नेतृत्वमा २५ जनाको बीओपी स्थापना गरिएको गुल्मपति बिष्टले जानकारी दिए । उक्त स्थानमा ६ महिनाका लागि पुग्ने खाद्यान्न, हातहतियार र बन्दोबस्तीका सामान हेलिकप्टरमार्फत ढुवानी गरिनेछ । भारतले गत शुक्रबार नेपाली भूमि लिपुलेक, कालापानीलगायत क्षेत्र अतिक्रमण गरी बनाएको सडक उद्घाटन गरेपछि सरकारको चौतर्फी विरोध भएको थियो । त्यसपछि मात्रै सरकारले बीओपी स्थापनामा तदारुकता देखाएको हो ।

गत मंसिरमै बीओपी स्थापनाका लागि छाङ्गरुमा जग्गा उपलब्ध भएको थियो । अहिले छाङ्गरुका एक स्थानीयको घर भाडा लिई बीओपी स्थापना गरिने र पछि संरचना बनाइने बताइएको छ । ब्यास क्षेत्रमा बीओपी स्थापना भएपछि सीमा सुरक्षासँगै चोरीसिकारी, आपराधिक गतिविधि नियन्त्रण र सुरक्षाको प्रत्याभुति हुने स्थानीयले बताएका छन् । कान्तिपुर