साग फुटबल फाइनल : भुटानमाथि नेपालको पहिलो गोल

काठमाडौं मंसिर २४: १३औं दक्षिण एसियाली खेलकुद (साग)को फाइनलमा नेपालले पहिलो गोल गरेको छ। खेलको १७ औं मिनेटको सुरुमै नेपालका अभिषेक रिजालले भुटानमाथि पहिलो गोल गरेका हुन्। 

दशरथ रंगशालामा मंगलबार दिउँसो ठिक ३ बजे सुरु भएको फाइनल भिडन्तको १७ औं मिनेटमा नेपालले अग्रता लिएको हो। अभिषेकको यो तेस्रो गोल हो। सागमा सुजल श्रेष्ठसँग उनले बराबरी गोल गरेका छन्। 

आइतबार भएको लिग चरणको अन्तिम खेलमा बंगलादेशलाई १–० गोलले हराउँदै नेपालले फाइनलमा भुटानसँगको भेट पक्का गरेको थियो। 

नेपालले लिग चरणको खेलमा भुटानलाई ४–० गोलले पराजित गरेको थियो। नेपाल लिग चरणको विजेता बन्दै फाइनलमा पुगेको हो। राउन्ड रोविन लिगका आधारमा सञ्चालित पुरुष फुटबलको शीर्ष स्थानमा रहेका नेपालले चार खेलबाट १० अंक बनाएको छ। नेपालले तीन जित र एक बराबरी नतिजा निकालेको थियो। तीन जित र एक हार खेपेको भुटान उपविजेता बन्यो। भुटानले नौ अंक बनाएको छ।

नेपालका प्रशिक्षक बालगोपाल महर्जनले खेलाडीले राम्रो खेल्दै फाइनलमा स्थान बनाएको र उपाधि नजिक पुगेको बताएका छन्। 

 ‘हामीले सबै खेलमा राम्रो खेल्यौं। लिग चरणको एउटा खेलमा इन्जुरी समयको गोलले बराबरी भयो। लिग चरणमै भुटानलाई फराकिलो अन्तरले हराएकोले फेरि हराएर उपाधि जित्न चाहन्छौं’, उनले भने। 

फाइनल खेल उपाधि रक्षाका लागि खेल्ने उनले बताए। नेपाल साग फुटबलको साबिक विजेता हो। भारतमा सन् २०१६ मा भएको १२औं संस्करणको फाइनलमा नेपालले आयोजक भारतलाई हराउँदै उपाधि जितेको थियो।