प्रचण्ड सुर्खेत आउने कार्यक्रम स्थगित

सुर्खेत : नेकपा माओवादी केन्द्रका अध्यक्ष पुष्पकमल दहाल ‘प्रचण्ड’ बिहीबार (आज) सुर्खेत आउने कार्यक्रम स्थगित गरिएको छ । पार्टीको प्रदेश कमिटीले वीरेन्द्रनगरमा आयोजना गरेको प्रशिक्षण कार्यक्रमलाई सम्बोन्धन गर्न पूर्व कार्यतालिकाअनुसार सुर्खेत आउन लागेका प्रचण्डसहितका नेताहरु आउने कार्यक्रम स्थगित भएको नेकपा माओवादी केन्द्र कर्णाली प्रदेश कमिटीका उपाध्यक्ष कृष्ण जिसी ‘जितेन्द्र’ले बताए ।

केन्द्रमा आकस्मिक बैठक आजै बस्ने भएकाले पूर्व प्रधानमन्त्री समेत रहेका अध्यक्ष प्रचण्डसहित केन्द्रीय नेताहरु सुर्खेत आउने कार्यक्रम स्थगित गरिएको जिसीले बताए । वीरेन्द्रनगरको सिटी हलमा आज आयोजना गरिएको प्रशिक्षण कार्यक्रममा भोलीसम्मलाई सारिएको उनको भनाइ छ । भोली हुने कार्यक्रममा उपाध्यक्ष नारायणकाजी श्रेष्ठ, उप-महासचिव शक्ति बस्नेत सहभागी हुनेछन् ।

प्रशिक्षण कार्यक्रममा प्रदेशका १० वटै जिल्लाका जिल्ला समन्वय समितिदेखि माथिल्लो तहका नेताहरु सहभागी हुनेछन् । पार्टीका उप-महासचिव समेत रहेका अर्थमन्त्री शर्माले विमा समितिको प्रदेश कार्यालयको उद्घान गर्ने कार्यक्रम रहेकाले उनी आजै नेपालगञ्जबाट सुर्खेत आएको जिसीले उल्लेख गरे ।