सहकारीले थाल्यो बाल विवाह रोक्ने अभियान

हिक्मत नेपाली
दैलेख पौष १८, दैलेखको गुरास गाउँपालिकाको दुई वटा वडालाई कार्यक्षेत्र बनाएको सहकारीले बाल विवाह रोक्ने अभियान थालेको छ । गाउँपालिकाको वडा नं. ७ र ८ लाँलीकाडालाई कार्य क्षेत्र बनाएर संचालित लाँलीकाडाँ कृषि बहुउदेश्यि सहकारी संस्थाले बाल विवाह रोक्ने अभियानको थालनी गरेको हो । सहकारीले आफ्नो कार्यक्षेत्रमा रहेका २ वटा वडामा स्थानीय बाल क्लब गठन गरि बाल विवाह रोक्ने अभियानको थालनी गरेको सहकारीका प्रबन्धक इश्वरी खड्का वलीले जानकारी दिइन् ।
अहिले सहकारीको कार्य क्षेत्र रहेका २ वटा वडामा दुई वटा बाल क्लब गठन गरिएको छ । गुरास गाउँपालिका वडा नं. ८ मा लाँलीगुरास बाल क्लब गठन गरिएको छ । उक्त क्लबमा १७ जना बालबालिकाहरुको सहभागिता रहेको छ । यस्तै वडा नं. ७ मा फुलवारी बाल क्लब गठन गरिएको छ । उक्त बाल क्लबमा स्थानीय २६ जना बालबालिकाहरुको सहभागि रहेको सहकारीका प्रवन्धक वलीले जानकारी दिइन् । सहकारी मार्फत गठन गरिएका बाल क्लबले स्थानीय स्तरमा बाल विवाह रोक्नका लागि अभियान संचालन गरिरहेका छन् । गाउँपालिका भित्र बाल विवाहको समस्या धेरै हुने गरेको बताउदै उनले उमेर नपुगी विवाह गर्ने प्रचलन लाई रोक्नका लागि आफुहरु यस्तो अभियानमा लागेको बताइन् ।
बाल विवाह भएको घरमा प्रहरी पुग्ने गरेको भएपनि देखावटी रुपमा बाल विवाह रोकिन्छ तर भित्री रुपमा विवाह गरेका केटा र केटी एउटै घरमा बस्ने गरेका कारण बाल क्लबको सक्रियतामा त्यस्तो समस्यालाई समाधान गर्न सकिने उनले बताइन् । अहिले जिल्लाका उमेर नपुगी बाल विवाह गरेको पाइएमा विवाह रोकेर केटा र केटीलाई अलग अलग राख्ने गरिएको छ ।
यस्तै सहकारीले आफ्नो कार्यक्षेत्रमा रहेको वडामा जोखिममा परेका बालबालिकाहरुलाई बर्षरी सहयोग गर्ने गरेको छ । जोखिममा परेका बालबालिकाहरुलाई बर्षको एक पटक सहयोग गरि उनिहरुको शिक्षा, स्वास्थ्य लगाएतका विषयमा सहजता भएको प्रबन्धन वलीले जानकारी दिइन् । उनका अनुसार सहकारीको दुई वटा वडामा यस बर्ष जोखिममा परेका १२ जना बालबालिकाहरुलाई आर्थीह सहयोग गरेको छ । यस्तै सहकारीले १३ जना बालबालिकाहरुलाई बाल अनुदान समेत प्रदान गरेको छ ।
सहकारीको आम्दानीबाट खर्च बटाएर बालबालिकालाई सहयोग गर्ने गरेको सहकारीले जनाएको छ । सहकारीको घुम्ती कोषबाट भएको आम्दानीको ५० प्रतिशत रकम बालबालिकाको क्षेत्रमा खर्च गरेको सहकारी स्रोतले बताएको छ । यस बर्ष सहकारीको कुल आम्दानीबाट १७ हजार बाल क्लबहरुलाई सहयोग गरिएको छ ।
सहकारीका अनुसार सहकारीमा आबद्ध सदस्यहरुले सहकारीबाट ऋण लिएर विभिन्न पेशा व्यवसाय संचालन गरिरहेका छन् ।
सहकारीबाट ऋण लिएर स्थानीय लोकेन्द्र खड्का, जय बहादुर खड्का, चक्र डांगी लगाएतले व्यवसायीक तरकारी खेती गरिरहेको सहकारीले जनाएको छ । व्यवसायीक रुपमा तरकारी खेती सचालन गरेका सदस्यहरुले बार्षिक ५लाख सम्म आम्दानी गर्ने गरेका छन् । यस्तै तरकारी खेती बाहेक मिल संचालन, बाख्रा पालन लगाएतका व्यवसाय संचालन गरेको सहकारीका प्रबन्धक इश्वरी खड्का वलीले जानकारी दिइन् । तरकारी खेतीका लागि उच्च मूल्य कृषि बस्तु विकास आयोजनाले पनि सहकारी मार्फत सहयोग गरेको छ ।
सहकारीको हाल सम्म कुल बचत ७८ लाख पुगेको छ । यस्तै सहकारीले १ करोड ६२ लाख रुपैया लगानी गरेको छ भने सहकारीको बाह्य लोन १८ लाख ७५ हजार रहेको वलीले बताइन् ।