११ वटै स्थानीय तहमा जाति तथा रंगभेद विरुद्धको दिवस

दैलेख फागुन २७।
दैलेख जिल्लाका ११ वटै स्थानीय तहमा जाति तथा रंगभेद विरुद्ध दिवस मनाईने भएको छ । हरेक बर्ष चैत्र ७ गते अर्थात तदनुसार २१ मार्चका दिन मनाइने अन्तराष्ट्रिय जाति तथा रंगभेद विरुद्धको दिवस यस बर्ष दैलेखका ११ वटै स्थानीय तहमा मनाउन लागिएको हो ।
शनिवार दैलेख सदरमुकामम बसेको तयारी बैठकले दलित नागरिक समाजका अगुवाहरुको समेत सहभागितामा दिवस मनाउने निणर्य गरिएको छ । स्थानीय तह दलित जनप्रतिनिधि मञ्च दैलेखले जिल्लाका ११ वटै स्थानीय तहमा चैत ७ गते मनाइने सो दिवस मनाउन सबै स्थानीय तहलाई आग्रह गर्ने निर्णय समेत गरिएको स्थानीय तह दलित जनप्रतिनिधि मञ्च दैलेखका संयोजक दिनेश विकले बताउनुभयो ।
जिल्ला सदरमुकाम स्थित नारायण नगरपालिका, दुल्लु, चामुण्डाविन्द्रासैनी, आठबीस नगरपालिका, गुराँस, डुङ्गेश्वर, भगवतीमाई, नौमूले, महाबु, भैरबी, ठाटीकाँध गाउँपालिकाको केन्द्रमा विविध कार्यक्रम गरि दिवस मनाउने तयारी गरिएको संयोजक विकको भनाई छ ।
दिवस मनाउन आयोजित तयारी बैठकमा प्रतिनिधिसभाका सदस्य सदस्य पार्वती बिशुन्केले पहिले आत्मजागरणको चेतनापछि दलित समुदायको आर्थिक उपार्जनको काममा अग्रसर गराउनुपर्ने आवश्यकता दर्शाउनुभएको छ । तयारी बैठकमा साँसद बिशुन्केले भन्नुभयो ‘दलित समुदायको सशक्तिकरणमा दलित जनप्रतिनिधि र दलित अगुवाको इमान्दार प्रयास हुनुपर्छ ।’ सोहि अबसरमा नेपाल कम्युनिष्ट पार्टी कर्णाली प्रदेश सदस्य गोपाल नेपालीले स्थानीय तहहरुले लक्षित कार्यक्रममा दलितका समस्यालाई कम महत्व दिएको टिप्पणी गर्नुभयो ।
नेपाल मजदूर किसान पार्टीका जिल्ला सचिव लक्ष्मीकुमार बिकले सदियौंदेखि जातीय विभेद र आर्थिक शोषणमा परेको दलित समुदायको राजनीतिक सचेतना जगाउन जरुरी रहेको बताउनु भयो । स्थानीय तह दलित जनप्रतिनिधि मञ्च दैलेखका संयोजक दिनेश बिकले पुरानै शासन शैली र राज्य संयन्त्रका कारण दलित समुदायले अपेक्षा गरेका अनुसार काम गर्ने वातावरण नभएको टिप्पणी गर्नुभयो । उहाँले जनप्रतिनिधिको आफ्नो भूमिका र दक्षता अनुसार केही उपलब्धी प्राप्त भएको उल्लेख गर्नुभयो ।