कोसेली स्वरुप रक्सी ल्याउने परम्परा हटाउन दलित युवाहरु अग्रसर

दैलेख पुष २८
आफन्तको मृत्यू संस्कारमा चेलीबेटीहरुले कोसेली स्वरुप रक्सी ल्याउने परम्परा हटाउन दलित युवाहरु अग्रसर भएका छन् । नारायण नगरपालिका–२ जाहारकोटका ६५ वर्षीय कविराम सार्की मृत्यूको ११ औं दिन पिपलपानी हाल्न आएका चेलीबेटीहरुले ल्याएको रक्सी मलखातमा पोखिएको हो ।

घरमा रक्सी नबनाउने सल्लाह थियो तर दिदीबहिनीहरुले ल्याउने तयारी गरेको जानकारी पाएपछि स्थानीय युवाहरुको सल्लाहमा रक्सी पोख्ने कुरा आफूले पनि सहमती जनाएको कविरामका छोरा इन्द्रबहादुर नेपालीले बताए ।
चेलीबेटीहरुलाई चित्त नदुखाउन सिल्पी समाज दैजेखका संयोजक बखत नेपाली र पत्रकार अमर सुनारले सामूहिक रुपमा आग्रह गरेपछि चेलीबेटी र इन्द्रबहादुरका परिवारले समेत सहमती जनाएर करिव ४० लिटर रक्सी मलखातमा पोखिएको थियो ।

रक्सी पोख्नुसंगै स्थानीय युवा स्वास्थ्य कार्यालयका लेखाअधिकृत दीपक नेपालीले दिनुभएको १० हजार र अरु समाजसेवीहरुको सहयोग समेत थपेर विपद् व्यवस्थापन कोषको पनि घोषणा गरिएको छ ।
चेलीबेटीले ल्याएको रक्सी पोखेपछि यस पटक पिपलपानी हाल्ने ठाउँमा शान्ति र सद्भाव देखिएको स्थानीय नानकली नेपालीले सुनाइन् । युवाहरुले धेरै पहिलेदेखि प्रयास गरेका थिए यस पटकदेखि कार्यान्वय भएको जेष्ठ नागरिक लालबहादुर सार्कीले बताए ।