ज्वाला सन्देश समचारदाता
दैलेख असोज –२, जिल्ला ट्राफिक प्रहरी कार्यालय दैलेखले गएको भाद्र महिनामा १ लाख बढी राजस्व संकलन गरेको छ । जिल्ला ट्राफिक प्रहरी कार्यालय दैलेखका अनुसार ट्राफिक प्रहरी कार्यालय दैलेखले गएको भाद्र महिना भरी नियम बिपरीत सञ्चालन हुने बिभीन्न सवारी साधनहरुबाट १ लाख ३ हजार ९ सय ५० रुपैया राजस्व संकलन गरिएको हो । नियम मिचेर चलेका ५६ बसबाट १४ हजार ३ सय, ९२ ट्रकबाट १८ हजार ८ सय, ८० ट्रयाक्टर बाट १६ हजार ५ सय पचास रुपैया राजस्व संकलन गरेको छ । यस्तै ६० वटा जिप कारबाट १८ हजार, र १ सय ६१ मोटरसाईकल बाट ३६ हजार ३ सय गरी कुल १ लाख ८ सय राजस्व संकलन गरेको जिल्ला ट्राफीक प्रहरी कार्यालय दैलेखका प्रहरी सहायक निरीक्षक छबिलाल ढकालले वताउनु भयो ।
यसरी प्रत्येक महिना लाखौँ राजस्व संकलन गर्ने जिल्ला ट्राफिक प्रहरी कार्यालय दैलेखको आफ्नै कार्यालय सञ्चालनको लागि पर्याप्त भवन र दैनिक, मासिक र बार्षिक डाटा राख्ने कम्प्युटर नहुँदा निकै समस्या हुने गरेको जिल्ला ट्राफिक प्रहरी कार्यालय दैलेखका प्रहरी सहायक निरिक्षक छविलाल ढकालले बताउनु भयो । उहाँले एक त सानो र साँघुरो कोठा नभएर एउटै कोठामा अफिस सञ्चालन गर्नु परेको समस्या त छँदै छ अर्कातिर आफुहरुले दैनिक गरेको कामको डाटा राख्ने कम्प्युटर नहुँदा निकै समस्या भएको बताउनु भयो । दिनभरी गरेको कामको साँझ ह्वाईट पेपरमा लेख्नु पर्ने र बर्षातको समयमा झरी पर्दा कागजात भिज्ने, मुसाले काट्ने, पुरानो भएर च्यातिएर जाने र कमिलाले गुड बनाउने समस्याले निकै सताउने गरेको ढकालले बताउनु भयो । उहाँले थप्नु भयो “आफुहरु सहयोगी हातहरुको पर्खाईमा रहेका छौं ।” जिल्ला ट्राफिक प्रहरी कार्यालको आफ्नै भवन निर्माणको लागि पहल भैरहेको र आफुले लिखित जानकारी माथि पठाएको जिल्ला प्रहरी कार्यालय दैलेखका प्रहरी नायव उपरीक्षक विरबहादुर वलीले बताउनु भयो । ट्राफिकको आफ्नै भवन भएको भए विभिन्न सामाग्रि राख्ने दखि लिएर धेरै कुराको सहजता हुने भन्दै जिल्ला प्रहरी कार्यालयको पनि प्रशासनिक भवन बाहेकका अन्य भवनहरु जिर्ण अबस्था रहेको वलीले बताउनु भयो । अब छिट्टै ट्राफिक भवन नयाँ ठाउँमा आफ्नै घर बनाएर वा कोठा भाडामा लिएर अलिक राम्रो ठाउँमा सार्न आफुले भरपुर पहल गर्ने र त्यो गर्न सकियो भने ट्राफिकको दैनिक कामकाजमा निकै सहजता आउने वलीले बताउनु भयो ।