सिलाईकटाई पेशा बाट मासिक १५ हजार आम्दानी ।।

भिम सिजापति
दैलेखको नारायण नगरपालिकामा सिलाईकटाई पेसा गद्रै आएकी सविता विक गाउँ समाजका लागि उदाहरण बन्नु भएको छ । व्यवसाय गरेर उहाँले राम्रो आम्दानी गरिरहनु भएको छ । सिलाई कटाई तालिम लिए पश्चात प्रशिक्षक समेत बन्नु भएकी सविताले प्रशिक्षक र सिलाईकटाई गरेर घरपरिवार चलाउन पनि सफल हुनु भएको छ । दैलेखको नारायण नगरपालीका ९ बाँसकोटकी सबिताको दैनिकी ५÷६ बर्ष अघि सम्म चुल्होचौको गर्दैमा बित्थ्यो तर उहाँले सिलाई कटाई पेसामा लागेर अचेल मासिक १५ हजार भन्दा बढी रकम कमाईरहनुभएको छ । एस.ओ.एस. सुर्खेतले २०६६ सालमा दिएको सिलाईकटाई तालीममा सहभागी उहाँ हाल प्रशिक्षक पनि हुनुहुन्छ । छोरा छोरीलाई राम्रो स्कुलमा पढाएर आफुले गर्न खोजेको काम गरेर सविताले पाँच जनाको परिवारको खर्च चलाउँदै आउनु भएको छ । घरपरिवारबाट पाएको सहयोगका कारण सजिलो भएको उहाँको अनुभव छ । दैलेख जस्तो विकट र जनचेतनाको कमी भएको जिल्लामा महिलाले सिलाई कटाईको काम गर्दा मान्छेले नराम्रो दृष्टिकोणले हेर्ने गरेको भए पनि आफुलाई त्यस्तो महसुस नभएको सविता बताउछिन । यस्तो गलत मानसिकता भएको समाजमा सिलाईकटाई व्यवसाय गरेर उदाहरणीय महिला बन्दाको खुशीले उहाँका सबै दुख र चुनौती बिसाईदिएका छन् । बिभिन्न सरकारी तथा गैर सरकारी निकायको सहयोगमा सिलाईकटाई तालिमको आयोजना हुन थालेपछि दैलेखमा सविता जस्तै सिलाईकटाईलाई व्यवसायको रुपमा अंगाल्नेको संख्या दिनानु दिन बढ्दै गएको छ ।