‘सामाजिक हितमा काम गर्ने योजनामा लगानी गर्न समस्या छैन’
दैलेख चैत १६
नारायण नगरपालिकाका नगरप्रमुख रत्नबहादुर खड्काले सामाजिक हितमा काम गर्ने योजनामा लगानी गर्न स्थानीय तहलाई समस्या नरहेको बताउनुभएको छ । नेपाल रेडक्रस सोसाइटी जिल्ला शाखाको आज दैलेख सदरमुकाममा आयोजित २५ औं जिल्लासभा अधिवेशन कार्यक्रममा उहाँले त्यस्तो भन्नुभएको हो ।
नगरप्रमुख खड्काले विपद र मानवीय सहयोगका क्षेत्रमा काम गर्ने रेडक्रस जस्तो पवित्र संस्थाले ठोस योजना ल्याएर आए नारायण नगरपालिका सहयोग गर्न तयार रहेको बताउनुभयो । उहाँले अगाडि थप्नुभयो त्यस्तो योजनालाई अरुले पनि सजिलै सहयोग गर्छन् ।
रेडक्रसमा सदस्यता दुई––ढाई सय मात्र बनाउने होइन, दश–पन्ध्र हजार सदस्य पु¥याएर बृहतर बनाउन आग्रह गर्दै नेतृत्वमा नयाँ पिढींलाई अवसर दिनुपर्ने नगरप्रमुख खड्काले टिप्पणी गर्नुभयो । कार्यक्रममा प्रमुख जिल्ला अधिकारी लक्ष्मीप्रसाद बासकोटाले रेडक्रसको मानवतावादी कार्य सर्वत्र प्रशंसा भएको उल्लेख गर्दै यो संस्थासंग सहकार्यता बढाउदै लैजाने बताउनुभयो ।
नेपाल रेडक्रस सोसाइटी जिल्ला सभापति खेमराज केसीको अध्यक्षतामा भएको कार्यक्रममा रेडक्रसको समाजसेवी काममा योगदान गरेका महानुभावहरु खड्गबहादुर सिजापती, मानवीर थापा, कर्णबहाुदर शाही, मणीराम रेग्मी र रमेश दशौदीलाई सम्मान गरिएको गरिएको थियो । त्यसबखत शाखा उपसभापति पूर्णबहादुर खत्री र कर्णाली प्रदेश कोषाध्यक्षले पनि रेडक्रसको महत्व बारे प्रकाश पार्नुभएको थियो ।
त्यसबखत शाखाका मन्त्री यमराज कटुवालले संस्थागत विकास सम्वन्धी र कोषाध्यक्ष सिर्जना खत्रीले आर्थिक प्रतिवेदन पेश गर्नुभएको थियो । कोषाध्यक्ष खत्रीले पेश गरेको प्रतिवेदनमा अघिल्लो आर्थिक वर्षमा १८ लाख ९४ हजार ५ सय २७ रुपैंयाँ खर्च भएको र चालु आर्थिक वर्षका लागि ३२ लाख २५ हजार जति खर्च हुनसक्ने अनुमान गरिएको छ ।
प्रतिक्रिया