कोरोना रोकथाममा कर्णालीका सबै जिल्लालाई एक/एक करोड, दैलेख अस्पताललाई थप ५० लाख

          |   प्रकाशित मितिः सोमवार, बैशाख २०, २०७८     ::: 70 पटक पढिएको   |  

दैलेख : कर्णाली प्रदेश सरकारले कोरोना रोकथाम तथा उपचारका लागि प्रत्येक जिल्लामा एक/एक करोड तत्काल उपलब्ध गराउने निर्णय गरेको छ । सोमबार बसेको मन्त्रिपरिषद्को बैठकले आवश्यक अक्सिजन सिलिण्डर, अक्सिजन आपूर्तिलगायतको व्यवस्थापन गर्न प्रत्येक जिल्लामा एक करोड रुपियाँ उपलब्ध गराउने निर्णय गरेको हो । आर्थिक मामिला तथा योजना मन्त्री एवं सरकारका प्रवक्ता विमला केसीले कोरोना रोकथाम तथा उपचारमा देखिएका समस्या समधान गर्न बजेट तत्काल बजेट पठाइने निर्णय गरेको जानकारी बताइन् ।
मन्त्री केसीका अनुसार प्रत्येक जिल्लामा एक/एक करोड, प्रदेश अस्पताल सुर्खेत, कर्णाली स्वास्थ्य विज्ञान प्रतिष्ठान जुम्ला र चौरजहारी अस्पताल रुकुमपश्चिममा थप एक/एक करोड बजेट पठाइने छ । यस्तै मेहेकुना अस्पताल सुर्खेत र दैलेख अस्पतालमा ५०/५० लाख रुपियाँ पठाउने मन्त्री केसीले जानकारी दिइन् ।
यस्तै बैठकले प्रदेश विपद् व्यवस्थापन कोषमा आर्थिक मामिला तथा योजना मन्त्रालयको अर्थ विविध कोषबाट ५० करोड रुपियाँ जम्मा गर्ने निर्णय गरेको छ । यस अघि प्रदेश सकारले कोरोना रोकथाम तथा उपचारका लागि विकास बजेट कटौती गरेर एक अर्बको कोष स्थापना गरेको थियो ।
मन्त्रिपरिषद्को बैठकले कोभिड–१९ रोगबाट मृत्यु भएका व्यक्तिको घरपरिवारलाई एक लाख रुपैयाँ प्रदान गर्ने निणर्य समेत गरेको छ । आवश्यक कार्यविधि र मापदण्डको आधार बनाई कोभिड–१९ रोगबाट मृत्यु भएका व्यक्तिको घरपरिवारलाई एक लाख रुपैयाँ प्रदेश विपद् व्यवस्थापन कोषबाट राहत रकम उपलब्ध गराउने निणर्य गरेको हो ।
पाँच जिल्लामा अक्सिजनसहित एक सय बेड तयार गरिने
कोरोना संक्रमितको संख्या बढ्दै गएपछि पाँच जिल्लामा अक्सिजनसहित एक सय बेड तयार गरिने गरी तयारी अघि बढाएको छ । कालीकोट, दैलेख , जाजरकोट, सल्यान र रुकुमपश्चिममा अक्सिजन सहित एक सय बेड र अन्य जिल्लामा अक्सिजनसहित ५० बेड तयार गरिनेछ । प्रदेश अस्पतालमा अक्सिजनसहित पाँच सय बेडको तयार गर्ने लक्ष्य लिएको र तत्तकाल एक सय बेड थप्ने काम तीव्र गतिमा भइरहेको सरकारले जनाएको छ ।





Leave a comment

Your email address will not be published.


*