घटनास्थलकाे फाेटाे साैजन्य जिल्ला प्रहरी कार्यालय दैलेख

दैलेख – निर्माण सामग्री लिएर दैलेखबाट कालिकोट जाँदै गरेको ट्रयाक्टर शनिवार दुर्घटना हुँदा चालकको ज्यान गएको प्रहरीले जनाएको छ ।

नौमूले गाउँपालिका–३ द्वारीका घर भएका चालक २८ वर्षीय शशिराम पुन मगरको ज्यान गएको जिल्ला प्रहरी कार्यालय दैलेखका इञ्चार्ज प्रहरी नायव उपरीक्षक (डीएसपी) किशोर लम्सालले जानकारी दिनुभयो ।

दैलेख सदरमुकामबाट कालिकोटको डिल्लीकोट तर्फ जाँदै गर्दा महाबु डाँडा नपुग्दै ना ७ त ४४७७ नम्वरको ट्रयाक्टर नौमूले गाउँपालिका–२ गेरुपानीको भीरबाट खस्दा चालकको घटनास्थलमै ज्यान गएको प्रहरीको भनाई छ ।

भीरको ठाउँ, साँघुरो र उकालो समेत भएकोले साथमा भएका सहचालक र अर्का एक यात्रु समेतलाई ओरालेर हाँकिरहेको बेला ट्रयाक्टर व्याक आएर भीरबाट खसेको सहचालकले बताउनुभयो ।

दुर्घटना हुँदा ट्रयाक्टर सडकबाट करिव २० मीटर तल खसेको, ट्रयाक्टरमा लिइएको सिमेण्ट, पाता लगायतका निर्माण सामग्री छरपष्ट परेको र मृतक चालकको शव पोष्टमार्टमका लागि दैलेख अस्पताल पुर्‍याइएको छ ।

निर्माण सामग्री कालिकाेटकाे महाबै गाउँपालिकाकाे कुनै विकास याेजनाकाे भएकाे घटनाकाे थप अनुसन्धान थालिएकाे प्रहरीले जनाएको छ ।