दैलेख प्रहरीको यस्तो छ दशैं सुरक्षा योजना

दैलेख असोज २८ ।
जिल्ला प्रहरी कार्यालय दैलेखले दशैं तिहार जस्ता चार्डलाई लक्षित गरेर विशेष सुरक्षा योजना संचालन गरेको छ । जिल्ला प्रहरी कार्यालय दैलेखले पत्रकार सम्मेलन गरी दशैं तिहार लगायतका चाडपर्व लक्षित विशेष विशेष सुरक्षा योजना संचालन भएको जानकारी गराएको हो ।

चाडपर्वको अवसरमा शान्ति सुरक्षालाई सुदृढ बनाउन जिल्लाका ११ वटै स्थानीय तहहरुसंग सहकार्य गरि जिल्लामा शान्ति सुरक्षा कायम गर्न र नागरिकको जनजीवनलाई सहज र सरल बनाउने उद्देश्यका साथ विशेष सुरक्षा योजना लागू गरिएको जिल्ला प्रहरी कार्यालय दैलेखका डिएसपी ठाकुर प्रसाद पोखरेलले जानकारी दिए ।

दैलेख प्रहरीको विशेष सुरक्षा योजना अन्तरगत दैलेखका विभिन्न स्थानमा सादा पोसाकका प्रहरी टोली परिचालन गरिएको छ । जिल्ला प्रहरी कार्यालय दैलेखका अनुसार दशैको समयमा जिल्ला स्थित सरकारी कार्यालयका कार्यालय सहयोगीलाई पनि प्रहरीको निगरानीमा राखिनेछ ।

विशेष सुरक्षा योजना प्रभावकारी बनाउनुका साथै जनताको जीउधनको सुरक्षाका लागि दैलेखका विभिन्न स्थानमा २ सय ४२ जना प्रहरी जनशक्ति परिचालन हुने दैलेखका प्रहरी प्रमुख डिएसपी ठाकुर प्रसाद पोखरेलले जानकारी दिए ।