कर्णालीमा एकैदिन ३ सय बढी कोरोना संक्रमित थपिए

सुर्खेत : कर्णालीमा एकैदिन  ३ सयभन्दा धेरै जनामा कोरोना भाइरस (कोभिड–१९) को संक्रमण पुष्टि भएको छ । पछिल्लो २४ घण्टामा थप ३ सय ११ जनामा कोरोना देखिएको हो । प्रदेशका विभिन्न प्रयोगशालाहरूमा गरिएको पीसिआर परीक्षणमा १ सय ३४ र एन्टिजेन विधिबाट गरिएको परीक्षणमा १ सय ६८ जनामा संक्रमण पुष्टी भएको स्वास्थ्य सेवा निर्देशनालय कर्णाली प्रदेशले जनाएको  छ । जसमध्ये सबैभन्दा धेरै २ सय १५ जना सुर्खेतका मात्र रहेका छन् ।  

यस्तै दैलेखमा ३२ जना, जुम्लाका ८, जाजरकोटका ७, सल्यानका २९, रुकुम पश्चिमका ९, कालिकोटका १०, डोल्पाका १ र अन्य प्रदेशका ३ जना रहेका छन् । योसँगै कर्णाली प्रदेशमा कुल संक्रमित हुनेको संख्या ८ हजार ८ सय ९५ पुगेको छ ।स्तै पछिल्लो २४ घण्टामा थप ३ जना संक्रमितको उपचारका क्रममा मृत्यु भएको छ भने  मृत्यु हुनेको संख्या ३८ पुगेको छ । योसँगै कर्णालीमा सक्रिय संक्रमितको संख्या ९ सय ८१ पुगेको छ । तीमध्ये सुर्खेतमा ६ सय १६ जना रहेको स्वास्थ्य निर्देशनालय कर्णाली प्रदेशले जानकारी दिएको छ । बुधबार निको भई ५ जना डिस्चार्ज भएका छन् भने पछिल्लो २४ घण्टामा मात्र २३० जना कोरोनाका बिरामी आइसोलेसनमा रहेका छन् ।