स्वामी वृक्ष संरक्षणमा स्थानीयले गरे, लाखौं खर्च

दैलेख, साउन ४ – पंचकोशी क्षेत्र अन्तर्गत नाविस्थानमा रहेको पुरानो विशाल स्वामीको वृक्ष संरक्षणमा स्थानीयहरुले लाखौं रकम खर्च गरेका छन् । आफ्नो पुर्खाले लगाएको वृक्षको सम्झाना गर्दै संरक्षणका लागि उनीहरुले पैसा उठाएर खर्च गरेका हुन् ।

रावतकोट घर भई नेपालजंग बस्दै आएका ८० वर्षिया वृद्ध पुराणप्रसाद शर्मा शास्त्रीको नेतृत्वमा स्वामीको वृक्ष संरक्षण गरिएको हो । जाजरकोटबाट बाल्यकालमा पुराणका बुवा पण्डित नारायणदत्तले ल्याएर लगाएको वृक्ष अहिले निकै ठुलो भएको र संरक्षण नहुँदा जडाहरु लथालिङ्ग भएपछि चौतारा बनाईएको हो । स्वामीको वृक्ष विक्रम सम्वत १९७३ सालमा नाविस्थानमा लगाईएको शिलालेखमा उल्लेख छ । मंगलवार एक कार्यक्रम गरी स्वामीको वृक्ष संरक्षण तथा चौतारा निर्माणको समुद्घाटन गरिएको छ । स्थानीय विकास अधिकारी हरि प्याकुरेलको प्रमुख अतिथ्यमा कार्यक्रममा गरिएको हो । स्थानीय विकास अधिकारी प्याकुरेलले सामाजिक कार्यमा आफ्ना पुर्खाले पु¥याएको योगदानलाई स्वामीको वृक्षको संरक्षण गरेको पुण्य काम गरेको बताए । कार्यक्रममा नाविस्थान संरक्षण समितिका अध्यक्ष तथा पदाधिकारीहरु, समाजसेवी जंगजग थापा, खड्कबहादुर सिजापती लगायत सहभागी भएका थिए ।
संरक्षण तथा चौतारा निर्माणका लागि पुराणप्रसाद शर्मा शास्त्रीले १ लाख २५ हजार, विष्णुप्रसाद शर्माले २५ हजार, डा. भागवतप्रसाद शर्मा

शास्त्रीले २५ हजार, भागवत हमाल रिजालले २५ हजार, कृष्णप्रसाद शर्माले ५ हजार, सरस्वती तिमेल्सेनाले ५ हजार, डम्वरकुमारी तिमेल्सेनाले ५ हजार, शशि गौतमले ५ हजार र कल्पना रेग्मीले ५ रुपैया गरी २ लाख २५ हजार रुपैँया खर्च गरी स्वार्मीको वृक्ष संरक्षण तथा चौतारा निर्माणमा खर्च गरिएको जनाईएको छ । अघिल्लो वर्षमा जिल्ला विकास समितिले १ लाख रुपैँया खर्च गरेर वृक्षको मुनि माटो हाल्ने काम गरेको थियो । पंचकोशी तिर्थस्थलमध्ये निकै महत्वपूर्ण स्थान रहेको नाविस्थानमा संरक्षण गरिएको स्वामीको वृक्ष हेर्न वर्षेनी यहाँ हजारौं मानिसहरु आउने गर्दछन् । स्वामीको वृक्षमै गणेशको मुर्तीको आधार हेर्न सकिन्छ । यसअघि वृक्ष र वृक्षमा रहेका गणेश आकृती हेर्नका लागि भक्तजनहरुको घुईचो लाग्ने भएपनि कहिले र कस्ले रोपेको भन्ने शिला नहुँदा अन्यौलमा हुने भएपनि अहिले वृक्षमुनी वृक्षका बारेमा सम्पूर्ण जानकारी सहितको शिला राखीएको छ ।