दुल्लु नगरपालिका : परिचयपपत्र लिन आउने पूर्णअशक्तलाई यातायात खर्च

दैलेख : जिल्लाको दुल्लु नगरपालिकाले शारीरिकरुपमा पूर्ण अशक्त तथा अपांगता भएका नागरिकलाई परिचयपत्र लिन आउँदा खाजा तथा यातायात खर्च प्रदान गर्ने भएको छ ।

दुल्लु नगरपालिकाका उपप्रमुख विना कार्कीका अनुसार नगरपालिकामा रहेका पूर्ण अशक्त (क वर्गको परिचयपत्र पाउने) वडा नम्बर ११, १२ र १३ का नागरिकलाई एकपटकका लागि २,५०० रुपैयाँ नगद दिने निर्णय गरेको हो ।

त्यस्तै, वडा नम्बर १, २, ३, ६, ९ र १० का लागि २,००० रुपैयाँ तथा वडा नम्बर ४, ५, ७ र ८ का लागि एक हजार रुपैयाँ दिने निर्णय गरेको हो ।
‘शारीरिक अपांगता भएका ‘क’ वर्गका नागरिकले परिचयपत्र लिन आउँदा सास्ती भोग्नु परेको मैले देखेको छु’, उपप्रमुख कार्कीले भनिन्, ‘यस्तो गर्दा कम्तिमा पूर्णअशक्त भएका नागरिकलाई नजिकको सरकार भएको महसुस हुने र परिचयपत्र लिन आउने क्रम बढ्ने आश छ ।’