जुम्लामा एकजना व्यक्तिको लडेर मृत्यु

जुम्ला :  जुम्लामा जन्त गएका एक व्यक्तिको लडेर मृत्यु भएको छ । शुक्रबार दिउँसो विवाह सकेर घर फर्कने क्रममा तिला गाउँपालिका– ६ सुडी गाउँपालिकाका ४७ वर्षीय देव रावतको लडेर मृत्यु भएको जिल्ला प्रहरी कार्यालय जुम्लाले जनाएको छ ।

मृतक रावतले अत्यधिक रूपमा मदिरा सेवन गरेको प्रहरीले जनाएको छ । जन्ती गएका अन्य साथीहरू समयमै घर फर्किसकेको र उनी अवेला सम्म पनि घर नफर्किए पछि खोजि गर्दा तिला गाउँपालिका– १ रारालिहीबाट घर फर्कने क्रममा बिचबाटोमा पर्ने तिला– ९ लाछुङथाडीस्थित गोरु खोलामा लडेर रावत मृत अवस्थामा फेला परेको जिल्ला प्रहरी कार्यालय जुम्लाका प्रहरी निरीक्षक धर्मराज जोशीले बताए ।

अहिले मृतकको शव पोस्टमार्टमका लागि कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा ल्याइएको निरीक्षक जोशीले जानकारी दिए ।