प्रधानमन्त्री कृषि आधुनिकीकरण परियोजना प्रभावकारी

जाजरकोट –  कृषि क्षेत्रमा सुधार गर्नका लागि सञ्चालनमा रहेको प्रधानमन्त्री कृषि आधुनिकीकरण परियोजना प्रभावकारी देखिएको छ । यहाँका विभिन्न पालिकाभित्र जोन, पकेट र ब्लक क्षेत्रमा परियोजना सञ्चालित छ । ती क्षेत्रमा भएको समीक्षाबाट परियोजनाले किसानको समस्या हल भएको पाइएको हो ।

परियोजना जाजरकोटका प्रमुख दीपेन्द्र पोखरेलले किसानको जीवनस्तर माथि उकास्न परियोजना प्रभावकारी भएको बताउनुभयो । पालिकाका कृषि शाखा प्रमुखबाट जनताले गरेका अपेक्षाका बारेमा जानकारी लिई भएका कामको सो अवसरमा समीक्षासमेत गरिएको छ ।

कार्यालयले ८६ दशमलव ४३ प्रतिशत काम भई लक्ष्य नजिक पुगेको उनले बताए । यसमा पशु अस्पताल तथा पशु सेवा कार्यालय जाजरकोटतर्फ बाख्रा ब्लक विकास कार्यक्रमअन्तर्गत ९५ दशमलव २४ प्रतिशत, सम्पूर्ण स्थानीय तहअन्तर्गत पकेट विकास कार्यक्रममा ८७ दशमलव ०९ प्रतिशत, जोन विकास कार्यक्रमतर्फ ८२ दशमलव चार प्रतिशत र कृषि विकास कार्यालय जाजरकोटबाट सञ्चालित विभिन्न ब्लकमा (तरकारी, स्याउ, ओखर र मकै) ब्लक विकास कार्यक्रमअन्तर्गत ८१ दशमलव आठ प्रतिशत प्रगति भएको परियोजना प्रमुख पोखरेलले बताउनुभयो ।

जिल्लामा यो कार्यक्रम लागू भएपछि हालसम्म १६ हजार सात सय ५४ जनाले प्रत्यक्ष रोजगारी पाएको र यो आर्थिक वर्षमा मात्र एक हजार सात सय ९० जनाले रोजगारी पाएको कार्यालयले जनाएको छ । कार्यालयले चारवटा विभागमध्ये तीनवटा (जोन, पकेट र ब्लक) विभाग चालु अवस्थामा रहेको बताएको छ ।

जोनअन्तर्गत सुन्तला जोन जिल्लाका सातवटा स्थानीय तहमध्ये चार स्थानीय तहमा कार्यान्वयनमा रहेको छ भने त्यस्तै ओखर जोन पाँचवटा स्थानीय तहमा र मौरी जोन तीनवटा स्थानीय तहमा कार्यान्वयनमा रहेको छ ।

उक्त कार्यक्रमबाट पाँच सय घरधुरीलाई सेवा प्रदान गरिएको कार्यालयको दाबी छ । आव २०७९÷८० मा सुन्तला जोनतर्फ पाँच मेट्रिक टन क्षमताका तीनवटा सेलार स्टोर निर्माण भई सञ्चालनमा आएसँगै सर्वसाधारण किसानलाई सहयोग पुगेको छ ।

छेडागाड नगरपालिका–१०, कुशे गाउँपालिका–८ र नलगाड नगरपालिका–३ मा सेलार स्टोर निर्माण भई कृषकले उत्पादन गरेका सुन्तलालाई सुरक्षित गर्न सहयोग पुगेको कार्यालयका कृषि प्राविधिक धरम चन्दले बताउनुभयो । जुनिचाँदे, बारेकोट, नलगाड र कुशेमा ओखर जोनतर्फ २१ वटा साना सिँचाइ निर्माण भएका छन् । त्यस्तै नौ ठाउँमा रहेका बगैँचामा थोपा सिँचाइ निर्माण भएको उहाँले बताउनुभयो ।

मौरी जोनतर्फ छ समूह÷सहकारी÷फार्मलाई मौरीका विभिन्न आधुनिक सामग्री वितरण गरी मह उत्पादनमा आधुनिकीकरणमा जोड दिइएको उहाँले बताउनुभयो । परियोजना लागू भएसँगै जिल्लामा सुन्तला, ओखर र मौरीपालक किसानलाई राहत पुगेको नलगाड–३ का किसान तुले थापाले बताउनुभयो ।-रासस