दैलेख जिल्लालाई ३४ साक्षर, आधारभुत शिक्षा प्रदायक, विद्यालय शान्ति क्षे्त्र धोषण कार्यान्वयन जिल्ला धोषणा
दैलेख, फागुन २८ । दैलेख पूर्ण साक्षर तथा अनिवार्य आधारभुत शिक्षा प्रदायक जिल्ला घोषणा गरिएको छ । शनिबार दैलेख सदरमुकाम दैलेख बजारमा आयोजित विशेष कार्यक्रमका बीच जिल्ला अदालत दैलेखका न्यायधिश प्रकाशप्रसाद पण्डितले दैलेखलाई पूर्ण साक्षर जिल्ला घोषणा गरे । पूर्ण साक्षर तथा अनिवार्य आधारभुत शिक्षा प्रदायक घोषणा गरिएको दैलेख ३४ औ जिल्ला हो । साक्षरता कार्यक्रम अन्तर्राष्ट्रिय तथा राष्ट्रिय प्राथामिकता प्राप्त हो ।
जिल्ला शिक्षा कार्यलय दैलेखको तथ्यांकअनुसार यस जिल्लाको साक्षरता ९५ दशमलव ६६ प्रतिशत रहेको छ । महिला ९५ दशमलव २० र पुरुष ९५ दशमलव ९८ प्रतिशत साक्षर रहेको जिशिकाको तथ्यांक छ । राष्ट्रिय जनगणना २०६८ अनुसार ८९ प्रतिशत साक्षरता थियो ।
२०७३ को शैक्षिक सत्रअनुसार आधारभुत तह (१ देखि ५ सम्म)मा ९८ दशमलव १, आधारभुत (६ देखि ८) ९८ दशमलव ९, माध्यमिक (९ देखि १०) ६० दशमलव २ र माध्यमिक तह (११ देखि १२) मा ४ दशमलव ६ प्रतिशत भर्ना दर रहेको छ । जिल्लामा सामुदायीक र संस्थागत गरी ५ सय ३० विद्यालय रहेका छन् । यी मध्ये ४ सय ३८ विद्यालय आधारभुत हुन भने बाँकी माध्यमिक तहका हुन् ।
दैलेखलाई पूर्ण साक्षर घोषणाका लागि जिल्लास्थित विभिन्न संघ संस्थाको पनि महत्वपूर्ण भुमिका रहेको जिल्ला शिक्षा कार्यलयले जनाएको छ । सामाजिक सेवा केन्द्र (सोसेक) नेपाल र सेभ द चिल्ड्रेनको साझेदारीमा सञ्चालित सहयात्रा परियोजनाले पनि यो अभियानमा महत्वपूर्ण भुमिका खेलेको थियो । यो अभियानमा सहयोग पुर्याएको भन्दै जिशिकाले जिल्लास्थित विभिन्न गैरसरकारी संघसंस्था, शिक्षक, विद्यालय, समाज सेवी, पत्रकारलगायतलाई सम्मान गरेको छ ।
प्रतिक्रिया