साविकको जिविसका कर्मचारीलाई विदाई तथा सम्मान

दैलेख जेठ ११
जिल्ला समन्वय समिति दैलेखले साविकको जिल्ला विकास समितिको कार्यालयमा काम गरि हाल स्थानीय तहमा कार्यरत कर्मचारीहरुको विदाई गरेको छ । जिसस दैलेखले विदाई भएर गएका ३७ जना कर्मचारीलाई मायाको चिनो, प्रमाणपत्र र खादा ओडाइएको थियो । कर्मचारी विदाई कार्यक्रमका अबसरमा जिल्ला समन्वय समितिका प्रमुख प्रेमबहादुर थापाले स्थानीय तहको सेवा प्रभावकारिता र श्रोतको उचित सदुपयोग गराउन स्थानीय तहका कर्मचारीलाई आग्रह गनुभएको छ । प्रमुख थापाले स्थानीय तहमा गएको बजेट र अधिकार अनुसारको काम लक्षित समुदायको जीवनस्तर उठाउने काममा उपयोग गर्न स्थानीय तहका जनप्रतिनिधिहरुलाई सघाउन कर्मचारीहरुको कर्तव्य समेत भएको स्मरण गराउनुभयो ।
दैलेखका प्रमुख जिल्ला अधिकारी लक्ष्मीप्रसाद बासकोटाले अरु निकायमा काम गरेका कर्मचारीको तुलनामा साविकको जिल्ला विकास समितिमा काम गरेका कर्मचारी कार्यशैली र क्षमता अब्बल रहेको बताउनुभयो । कार्यक्रममा चामुण्डाबिन्द्रासैनी नगरपालिकाका प्रमुख प्रशासकीय अधिकृत तिलक बिकले आफूले साविकको जिविसमा कामगर्दा सिकेको ज्ञान र क्षमताले आफूलाई अधिकृत बन्न सघाएको बताउदै यो उपलब्धीको श्रेय दिंदै अहिलेको जिल्ला समन्वय समितिले सम्झेकोमा धन्यवाद दिनुभयो । कार्यक्रममा साविकको जिल्ला विकास समितिमा काम गरेका सुनिता केसी खाण र नेपाल निजामती कर्मचारी संगठनका जिल्ला अध्यक्ष तीर्थबहादुर जीसीले आ–आफ्नो विचार राखेका थिए ।