सबै समुदायको साझा पर्व बन्दै लाखे नाच

दैलेख १८ भदाै
बिशेष गरि नेवार समुदायले मनाउँदै आएको लाखे नाच दैलेखमा भने सबै समुदायको साझा पर्वको रुपमा विकास हुन थालेको छ । नेवार समुदाय बाहेक अन्य समुदायले समेत पर्व मनाउन थालेपछि सबै समुदायको साझा पर्वको रुपमा विकास हुन थालेको हो । लाखे नाच संरक्षण गर्नका लागि दैलेखका नेवार समुदाय संगै अन्य समुदायले पर्वका रुपमा मनाउन थालेका हुन् ।

दुई सय बर्ष देखि संचालन हुँदै आएको लाखे नाच लोप हुन नदिन अन्य समुदायले नाचको शुरुवात गरेका हुन् । जिल्ला सदरमुकाम दैलेख बजार लगाएत ग्रामिण स्तरमा समेत लाखे नाचको बर्चश्व छाएको छ । लाखे नाच (बर्षे मेला) भगवान श्री कृष्णको जन्मलिलासँग सम्वन्धित मेला सोमवार दैलेखमा सम्पन्न भएको हो । गत श्रावण २४ गते गाँठेमंगल घण्टाकर्ण बाट सूरु भएको लाखे नाच एक महिने लामो बर्षे मेला सोमवार सम्पन्न भएको हो । आइतवार राती १२ बजे श्री कृष्णको जन्म गराई सोमवार कृष्णले लाखेको बध गरेपछि मेला सम्पन्न हुने गर्दछ ।

श्रीकृष्णले कंशलाई मारेको सम्झनामा यो लाखे नाच नाच्ने गरिन्छ । एक महिना सम्म नाचिने यो लाखे नाँचको श्रीकृष्ण जन्माष्टमीको भोलीपल्ट समापन गर्ने परम्परा रहेको छ ।दैलेख सदरमुकाम, दुल्लु, बेस्तडा, नौमूले, डुङ्गेश्वर लगायतका स्थानियका घर तथा बजारमा सो नाचको प्रर्दशन गरिन्छ । दैलेखको दुल्लु, सदरमुकाम दैलेख बजार संगै विभिन्न ग्रामिण भेगहरुमा एक महिना अघि देखि सुरु भएको लाखेनाच आज हर्षउल्लासका साथ समापन भएको हो ।
दैलेख सदरमुकाम परिक्रमा संगै स्थानीय टुडिखेल र छात्राबासमा विधिपूर्वक लाखेनाच समापन गरिएको हो ।

यहाँको लाखेनाच समापनको अन्तिम दिनलाई जात्राको रुपमा मनाउने प्रचलन रहेको छ । स्थानीयले बाजागाजाको साथमा बजार क्षेत्रका घर आँगनमा पुगेर नाच्दै रमाउने यस जात्राले आपसी सद्भाव र सहिष्णुता कायम गर्ने विश्वास रहेको छ । हरेक बर्ष कृष्णाजन्मष्टमीको भोलीपल्ट भव्य रुपमा समापन हुने लाखेजात्राले सबै समुदायको बीचमा आपसी सद्भाव कायम गर्न मद्दत पुग्ने जनविश्वास छ । लाखेजात्रा समापनको दिन यस रमाईलो उत्सव हेर्न सदरमुकाम दैलेख बजार, दुल्लु बजार र जिल्लाका विभिन्न स्थानबाट सर्वसाधारणको घुँईचो लाग्ने गर्दछ ।