पार्टीको बैठक बसेर सरकारलाई दिएको समर्थन फिर्ता लिने निर्णय गर्छौं : रास्वपा

काठमाडौँ –   राष्ट्रिय स्वतन्त्र पार्टी (रास्वपा)का प्रवक्ता मुकुल ढकालले पार्टीको बैठक बसेर सरकारलाई दिएको समर्थन फिर्ता लिने बताउनुभएको छ । पार्टी केन्द्रीय समिति र संसदीय दलको बैठक बसेर सरकारलाई दिएको समर्थन फिर्ता लिने तयारी गरिएको ढकालले बताउनुभयो ।

‘हामीले सरकारलाई दिएको समर्थन फिर्ता लिने तयारीमा छौं । अब केन्द्रीय समिति र संसदीय दलको बैठक राखेर छलफल गर्नुपर्यो’ ढकालले भन्नुभयो, ‘बैठक कहिले राख्ने भन्ने विषयमा परामर्श गर्दैछौं । बैठक बसेर आधिकारिक निर्णय हुनेछ ।’ सरकारलाई दिएको समर्थन फिर्ता किन लिँदछौ भन्ने विषयमा बैठकमा गम्भीर छलफल हुने ढकालले बताउनुभयो ।

प्रचण्ड नेतृत्वको सरकार बनाउने क्रममा गत पुस १० गते राष्ट्रपतिलाई हस्ताक्षर बुझाउने बेला रास्वपा सरकारमा सहभागी भएको थियो । सो पार्टीले गत माघ २२ गते सरकारबाट बाहिरिने निर्णय गरेको थियो भने प्रधानमन्त्री प्रचण्डले दुईपटक विश्वासको मत लिँदा दुवैपटक मत दिएको थियो ।