पहाडी क्षेत्रका थोरै ठाउँमा मेघगर्जनसहित पानी पर्ने सम्भावना

काठमाण्डाै – देशका पहाडी क्षेत्रको थोरै ठाउँमा आज पनि मेघगर्जन र चट्याङ्गसहित पानी पर्ने सम्भावना छ ।

प्रि–मनसुनी गतिविधि सक्रिय नै रहेको र आज कोशी, वाग्मती र गण्डकी क्षेत्रमा कतै कतै मेघगर्जन, चट्याङ्गसहित पानी पर्ने सम्भावना रहेको जल तथा मौसम पूर्वानुमान महाशाखाले जनाएको छ । महाशाखाका मौसमविद् सन्जिव अधिकारीका अनुसार ती क्षेत्रको मौसम अहिले आंशिक बदली रहेको छ ।

काठमाण्डौ उपत्यकामा पनि दिउँसोपछि हल्का वर्षाको सम्भावना छ । आज कोशी प्रदेश र मधेश प्रदेशको तराई क्षेत्रमा हावाहुरीको सम्भावना रहेको मौसमविद् अधिकारीले बताउनुभयो । आज राति पनि कोशी र गण्डकी प्रदेशमा मौसम आंशिकदेखि सामान्य बदली रहने अनुमान छ । ती क्षेत्रको पहाडी थोरै ठाउँमा  मेघगर्जन र चट्याङ्गसहित क्षणिक वर्षाको सम्भावना रहेको छ ।

अबका तीन दिन नै मौसम यस्तै रहने अनुमान छ । अहिले पश्चिमी वायुका साथै स्थानीय वायुको सामान्य प्रभाव रहेको छ ।